M23 yatangaje ko abarwanyi bawo baryamiye amajanja, mu rwego rwo kwitegura ibitero by’umutwe wa FDLR witegura kuyigabaho ibitero.
Ni ibyatangajwe na Lt Col Alfred Musubao Muriro uri mu basirikare bakuru uyu mutwe ufite, mu mashusho agaragaramo aha amabwiriza abarwanyi b’uriya mutwe.
Muri aya mashusho yafashwe n’ikinyamakuru Kivu Press, Lt Col Muriro yumvikana avuga ko nka M23 badashaka kurwana, ariko nibaterwa na FDLR bazitabara.
Ni nyuma yo kubazwa n’umunyamakuru niba biteguye kurwana na FDLR.
Ati: “Ntidushaka ko imirwano yongera gutangira, ariko nibaramuka baduteye nta yandi mahitamo tuzaba dufite.”
Yunzemo ko nka M23 bakomeje gusaba Leta ko baganira ku bibazo bihari bakabibonera umuti mu mahoro, ariko bisa n’aho urundi ruhande icyo rushaka ari intambara gusa.
Amakuru aturuka muri Congo Kinshasa aravuga ko inyeshyamba za FDLR zikomeje kwisuganya gake gake, by’umwihariko mu bice M23 yahoze igenzura mbere yo kubivamo ikabisigira Ingabo za EAC.
Bivugwa ko uku kwisuganya gushobora gusiga hubuye imirwano ikomeye hagati y’impande zombi.
Lt Col Muriro ubwo yahaga amabwiriza abarwanyi ayobora, yumvikana abasaba “kuryamira amajanja kugira ngo tutazatungurwa n’umwanzi.”
Ati: “Mfite amakuru y’uko umwanzi akomeje kudusatira. FDLR iri guturuka muri kiriya cyerekezo muryamire amajanja. Muranyumva? Ndabizi ko nta mbaraga afite, ariko nimuryamire amajanja, naramuka aje muzamukosore. Nagerageza kwinjira mu birindiro byanyu muzamurase.”
M23 iritegura kurasana na FDLR mu gihe imaze iminsi mu mirwano n’indi mitwe y’abanye-Congo ishyigikiwe na Leta y’i Kinshasa.
Lt Col Dieudonné Kabengere na we wo muri M23 yavuze ko ari ikibazo kuba uriya mutwe ugizwe n’Ingabo zakoze Jenoside mu Rwanda ku butegetsi bwa Juvénal Habyarimana zikomeje kubiba umwuka mubi muri Congo.
Uyu musirikare yashinje FDLR gufatanya na Guverinoma ya Congo mu kubiba urwango, amacakubiri n’ihezwa ry’igice kimwe cy’abaturage, ashimangira ko badashobora kwipfumbata, ngo barebere.
About The Author
