Umutwe witwaje intwaro wa M23 warahiye ko utazongera kuva ku butaka bwa Repubulika iharanira Demukarasi ya Congo nk’uko wigeze kubigenza mu mwaka w’2013 ubwo watsindwaga n’ingabo za Leta zari zifatanyije n’iziri mu butumwa bw’amahoro bw’Umuryango w’Abibumbye, MONUSCO.
Mu kiganiro na VOA, Umuvugizi wa M23, Maj. Willy Ngoma yatangaje ko kuri ubu bazarwana n’ingabo za Leta kugera ku iherezo. Ati: “Tuzarwana na bo kugera ku iherezo. Twebwe nka M23 ntabwo tuzongera kuva ku butaka bwa Congo. Ntituzongera gukora ikosa ryo guhungira mu kindi gihugu nko mu gihe twahungiye muri Uganda. Niba umuntu atekereza atyo, aribeshya.”
Uyu musirikare mu kiganiro aherutse kugirana na Bwiza, yavuze ko ingabo za MONUSCO ziri kwifatanya n’uruhande rurwanya M23, kandi abarwanyi b’uyu mutwe ngo ntibashaka kurwana na zo kubera ko ari iz’Umuryango w’Abibumbye.
Yongeye kuvuga ko niba izi ngabo zirakomeza urugamba rwo kubarwanya, bazemera kwicwa na kajugujugu zazo, aho kwicwa baciwe imitwe n’imitwe yitwaje intwaro bashinja kwifatanya n’ingabo za Leta irimo FDLR ikomoka mu Rwanda na za Mai Mai zikomoka muri RDC.
M23 isobanura ko abarwanyi bayo ari Abanyekongo baharanira uburenganzira bwabo, bashaka kubaho neza n’imiryango yabo.
Imirwano ya M23 n’ingabo za RDC guhera tariki ya 24 yakomereje mu gace ka Kibumba kari muri Teritwari ya Nyiragongo, nyuma y’iminsi myinshi yari ishize ibera muri gurupoma ya Jomba muri Teritwari ya Rutshuru. Aho ibera ni mu bilometero bibarirwa muri 20 werekeza mu mujyi wa Goma.
About The Author
Ibyo nibyo yibwira! Barayikubita muminsi mike yongere ihunge