Mu mikino ya shampiyona yo mu gihugu cy’Ubwongereza (Engaland Premier League) ikipe ya Liverpool yatakaje amanota ubwo yanganyaga n’ikipe ya Totenham Hotspurs igitego 1-1.
Ni umukino ikipe ya Liverpool yakiriye ukaba ari umukino wari ukomeye ku mpande zombi kuko Liverpool yari ikeneye kuwutsinda kugira ngo ikomeze yotse igitutu ikipe ya Man City ndetse na Totenham ikaba yari ikeneye guhatanira umwanya wo kuguma mu makipe ane ya mbere.
Ikipe ya Totenham ni yo yabanje igitego ku munota wa 56 w’igice cya kabiri gitsinzwe na Heung Min Son ku mupira yari ahawe na Sessegnon ni mu gihe igitego cya Liverpool cyabonetse ku munota wa 74 gitsinzwe na Luis Diaz ku mupira yari ahawe na Thiago.
Uyu mukino warangiye aya makipe yombi agabanye amanota nyuma yo kunganya byatumye ikipe ya Liverpool igira amanota 83 iza ku mwanya wa mbere nubwo inganya amanota na Man City ifite umukino na New Castle ku buryo iwutsinze yahita iyobora urutonde rwa shampiyona.
Gutakaza amanota kwa Liverpool byatumye ikipe ya Man City ikomeza kugira amahirwe menshi yo gutwara iki gikombe cya shampiyona ku nshuro ya gatatu yikurikiranya.
About The Author
