Mu mukino w’ishiraniro wari utegerejwe na benshi uhuza amakipe y’amakeba b’ibihe byose ariyo; Rayon Sports na Kiyovu Sports urangiye ikipe ya Kiyovu yerekanye ko ifite gahunda ntakuka yo gutwara igikombe cya shampiyona.
Ni umukino wabereye kuri sitade ya Kigali i Nyamirambo, ikipe ya Rayon Sports akaba ari yo yari yakiriye Kiyovu mu mukino watangiye ku isaha ya saa cyenda kuri uyu wa gatandatu buri wese ahiga gutsinda undi ariko birangira Rayon Sport igaragaje ko yigizaga nkana.
Ni umukino ikipe ya Kiyovu Sports yari ifite mu biganza aho yanabyerekanye mu minota ya mbere ikubita poto inshuro ebyiri ariko ku munota wa 35 umukinnyi wa Kiyovu ukomoka mu Burundi Abedi Bigirimana atsinda igitego cy’umupira w’umuterekano Kiyovu iba iyoboye umukino utyo.
Mu gice cya kabiri amakipe yombi yakomeje gusatirana ariko Rayon Sports ikomeza kubura icyo kwishura ari nako impinduka zakorwaga ku mpande zombi ni ko gushiramo rutahizamu Muhozi Fred ku ruhande rwa Kiyovu maze ku minota y’inyongera y’umukino Rayon Sports irwana no kwishyura, Muhoz waturutse mu ikipe ya Espoir FC yo mu karere ka Rusizi ku mupira yari ahawe na Mutyaba yatsinze igitego cy’agashinguracumu maze kiyovu igira 2-0 Rayon sports.
Gutsinda uyu mukino kuri Kiyovu bikomeje kuyihesha amahirwe menshi yo gutwara igikombe cya shampiyona ari na ko Rayon Sports isezera kuri iki gikombe ikaba irwana n’umwanya mwiza. Muhoozi Fred amaze gutsinda iyi kipe ya Rayon ibitego 3 mu mikino ibiri bahuyemo kuko yayitsinze ibitego 2 akiri mu ikipe ya Espoir none akaba ayisubiriye ari muri Kiyovu Sports.
About The Author
