Umunyezamu wa AS Kigali, Kimenyi Yves, yagiriye imvune ikomeye mu mukino w’Umunsi wa Cyenda wa Shampiyona ikipe ye yatsinzwemo na Musanze FC igitego 1-0.
Iyi mvune yayigize ku munota wa 26 ubwo yasohokaga agiye gukiza izamu agahura na Rutahizamu w’Umunya-Nigeria Peter Agblevor, wamushinze amenyo y’inkweto amuvuna amagufa abiri y’umurundi (tibia na péroné).
Iri kosa Agblevor yakoze ryatumye anahabwa ikarita itukura. Hari mu mukino w’Umunsi wa Cyenda waberaga kuri Stade Ubworoherane ku Cyumweru, tariki ya 29 Ukwakira 2023.
Nyuma yo kuvunika, Kimenyi yahise ashyirwa mu mbangukiragutabara byihuse, ajyanwa kuvurirwa mu Bitaro bya Ruhengeri.
Aganira na IGIHE, Team Manager wa A S Kigali, Bayingana Innocent, yavuze ko uyu munyezamu agiye kwimurirwa mu Bitaro bya Gisirikare i Kanombe.
Yagize ati “Yavunitse igufa ry’ukuguru, ni imvune ikomeye cyane. Twahise tumujyana ku Bitaro bya Ruhengeri kumuha ubutabazi bwihuse mu gihe turi kumushakira urupapuro rumukomezanya i Kanombe mu Bitaro bya Gisirikare ari naho ari burare.”
Yavuze ko bataramenya igihe azamara hanze y’ikibuga ariko uko yabibonye ngo si imvune izakira byihuse.
Ku rubuga rwa X (yahoze yitwa Twitter) rwa AS Kigali, iyi kipe yagize ati “Kimenyi Yves yagize imvune y’amagufa abiri agize umurundi (tibia & péroné). Ubutabazi bwibanze bwagenze neza, agiye kubagwa i Kigali.”
Muri uyu mukino, Musanze FC yatsinze AS Kigali igitego kimwe, cyinjijwe n’Umunya-Nigeria, Solomon Adeyinka Illessammi ku munota wa 11.
Iyi ntsinzi yatumye Musanze FC ikomeza kwicara ku ntebe y’icyubahiro n’amanota 20 ikurikiwe na APR FC [yanganyije na Rayon Sports 0-0] n’amanota 18, Police FC ya gatatu ifite amanota 16 mu gihe Kiyovu Sports ya kane na Mukura VS ya gatanu zinganya amanota 15. AS Kigali ya Kimenyi Yves ni iya cyenda n’amanota icyenda.
About The Author
