Muri iki gitondo cyo kuri uyu wa kane tariki ya 13 Mutarama 2022, Abamotari benshi bakorera mu mujyi wa Kigali babyukiye mu myigaragambyo aho bavuga ko bakatwa amafaranga menshi mu gukoresha mubazi bakibaza niba bikorera cyangwa bakorera abandi.
Nkuko igihe kibitangaza ngo aba bamotari bose bahuriza hamwe ko bafite ikibazo cy’amafaranga menshi basigaye bakatwa ku ikoreshwa rya mubazi no kuba ubwishingizi bwa moto busigaye buzamuka umunsi ku wundi.
Simpari Shema Pierre ni umwe mu bamotari bari muri iyi myigaragambyo hafi y’ahahoze Gereza ya Nyarugenge, yabwiye Igihe ko icyo bifuza ari uko ibibazo byabo bikemuka.
Ati “Turifuza ko ibibazo bikemuka, kuko turi gukorera amafaranga menshi agatwarwa n’abandi nk’aho aribo bashoye. Umuntu arakorera ibihumbi bibiri bagatwaraho 300 Frw?”
Shema yavuze ko hari amakuru batigeze bahabwa ubwo basabwaga gukoresha mubazi, baza kwisanga bazitangaho amafaranga menshi kandi batari babizi.
Ati “Hari ikibazo cya mubazi, hari n’ibindi bibazo bigendanye n’ubwishingizi bari batubwiye ko babugabanya ariko ntabwo byakozwe. Ikindi na Yego Moto iri kuturenganya, kandi ntabyo twari twarabwiwe.”
About The Author
