Urwego rw’Ubugenzacyaha mu Murenge wa Gashari, rwataye muri yombi abantu batandatu bakekwaho kwica umukecuru witwa Mukarusine Donatille bamuciye umutwe.
Byabereye mu Kagari ka Nkoto, Umurenge wa Murambi mu Karere ka Karongi ku mugoroba wo ku Cyumweru tariki 26 Gashyantare 2023.
Abo mu muryango w’uyu mukecuru babonye adatashye batangira kumushakisha baza kubona umurambo we mu ishyamba yaciwe umutwe ariko umutwe wo barawubura.
Umutwe we waje kuboneka mu rutoki mu gitondo cyo kuri uyu wa Gatatu tariki 1 Werurwe 2023.
Umunyamabanga Nshingwabikorwa w’Umurenge wa Murambi, Uwimana Phanuel yabwiye Igihe ko nyuma yo kumenya aya makuru kuri uyu wa Kabiri, ubuyobozi bwakoreye inteko y’abaturage muri aka Kagari, butanga ubutumwa bw’ihumure ndetse bunashishikariza abaturage kwicungira umutekano no gutanga amakuru kuri ubu bugizi bwa nabi.
Ati “Baduhamagaye babitumenyesha tugezeyo dusanga ni ko bimeze. Hari abantu batandatu bamaze gufatwa bakekwaho uruhare mu rupfu rw’uyu mukecuru w’imyaka 64 bafungiye kuri RIB sitasiyo ya Gashari mu gihe iperereza rikomeje”.
Uwimana yavuze ko ari ubwa mbere ikibazo nk’iki kibaye muri uyu murenge.
Ati “Ni ibintu bibi cyane abaturage bakwiye kwirinda. Niba ari umuntu ufitanye ikibazo na mugenzi we yakwegera ubuyobozi bukaba bwabafasha kugikemura ariko badashatse ibyo by’ubwicanyi.”
Uyu mukecuru yari asanzwe avugwaho uburozi nubwo nta gihamya n’imwe ababivuga bafite.
About The Author
