Umugabo w’imyaka 27 y’amavuko wakoraga akazi ko kurinda umutekano mu isantere y’ubucuruzi ya Kabadaha mu Kagari ka Bibungo mu Murenge wa Nyamiyaga mu Karere ka Kamonyi, yishwe n’abajura atemwe mu mutwe anaterwa icyuma mu musaya.
Ahagana saa munani z’ijoro ku Cyumweru tariki ya 3 Mata 2022, nibwo abajura batemye uyu mugabo wari ushinzwe kurinda umutekano muri aka gasantere ka Kabaduha.
Umunyamabanga Nshingwabikorwa w’Umurenge wa Nyamiyaga, Mudahemuka Jean Damascene, yabwiye Igihe ko aba bajura bahengereye mugenzi wa nyakwigendera atakoze baba aribwo bamwica.
Yagize ati “Byabaye nka saa munani z’ijoro ku Cyumweru, yarariraga kuri santere y’ubucuruzi abajura bamutera ibyuma bahengereye umwe muri bagenzi be bakorana atabonetse baca muri icyo cyuho cyo kuba hari mugenzi we udahari baramwica.”
Hamaze gutabwa muri yombi abantu babiri bakekwa kugira uruhare mu rupfu rwa nyakwigendera mu gihe iperereza rikomeje.
About The Author
