Urwego rw’Igihugu rw’Ubugenzacyaha RIB ruherutse gutangaza ko rwataye muri yombi Igabe Egide ukekwaho gukora icyaha cyo gukoresha inyandiko mpimbano y’impamyabumenyi y’ikiciro gihanitse cya kaminuza PHD yakoreshaga mu gusaba akazi muri kaminuza zitandukanye zo mu Rwanda.
Ibi, RIB yabitangaje tariki ya 7 Mutarama 2022 ibitangarije kuri Twitter ko ifungiye Igabe muri sitasiyo yayo ya Kicukiro, nyuma y’aho agerageje gusaba akazi muri kaminuza zitandukanye mu Rwanda, akoresheje iyi mpamyabumenyi avuga ko yakuye muri kaminuza ya Atlantic International yo muri Leta Zunze Ubumwe za Amerika.
Nyuma yuko ayo makuru yose asakaye ku mbuga zitandukanye cyane cyane kuri twitter, Iyi kaminuza ya Atlantic International nayo aya makuru yayigezeho ijya mu bitabo yandikamo abanyeshuri bayizemo maze basanga uyu Igabe Egide yari umunyeshuri wabo ndetse ko yahavanye impamyabumenyi y’ikiciro gihanitse PHD.
Nyuma yo kubireba iyi kaminuza nayo yaje kuri twitter inyomoza ayo makuru ko ari impimbano yemeza ko uyu Igabe Egide yakuye PHD muri iyo kaminuza bityo ko iyo mpamyabumenyi yemewe kandi yizewe.
Yagize iti: ”Kaminuza ya Atlantic International iremeza ko Dr.Igabe Egide yarangije mu kiciro cya kaminuza gihanitse PHD. Ibi biremezwa n’amakuru twakuye mu bubiko bwa Kaminuza mu bijyanye n’Abanyeshuri bahize”
Nyuma yaya makuru ntabwo Urwego rw’Igihugu rw’Ubugenzacyaha rwari rwagira icyo rubivugaho, igihe uru rwego rwagira icyo rutangaza kuri iyi ngingo twabibagezaho gusa, RIB yavugaga ko irimo gukora dosiye ya Igabe kugira ngo iyishyikirize Ubushinjacyaha.
About The Author
