Ishyamba si ryeru mu ikipe ya Rayon Sports

Ibintu ntabwo bimeze neza mu ikipe ya Rayon Sports aho bivugwa ko umutoza w’iyi kipe atari kumvikana n’abakinnyi bayo abashinja gukina batitangira iyi kipe abereye umutoza.

Uyu mwuka mubi watangiye kuvugwa ejo ku wa gatandatu ubwo iyi kipe yari imaze gutsinda Gorilla FC kuri sitade ya Kigali i Nyamirambo iyitsinze 1-0 cyatsinzwe na Moussa Essenu ku munota 33. Ni umukino benshi bagaragazaga ko iyi kipe ya Rayon sports itakinnye neza dore ko bavugaga ko ikipe ya Gorilla yirangayeho ko yagombaga kuba yatsinze iyi kipe ya Rayon Sports.

N’ubwo iyi kipe ikunzwe na benshi mu Rwanda yatsinze, ariko mu rwambariro rwa yo harimo umwuka mubi ushobora kuyigiraho ingaruka mbi mu mikino iri imbere. Ibi bishimangirwa n’imyitwarire umutoza mukuru wa Rayon yagaragaje, ubwo iyi kipe yakinaga na Gorilla FC ndetse na nyuma y’uyu mukino.

Jorge Manuel da Silva Paixão Santos, yabanje kubaza abakinnyi b’ikipe abereye umutoza, niba bamurambiwe bakaba bashaka gutsindisha ikipe ngo abibazwe nk’umutoza mukuru.

Ibi byabaye ubwo igice cya Mbere cy’umukino cyari kirangiye, ikipe iri mu rwambariro. Ibi akabihera ku buryo we abona ko ikipe yakinaga nabi ugereranyije n’abakinnyi ifite ndetse n’imyitozo we yabakoresheje. Amakuru avuga ko ndetse byanashobokaga ko atari kugaruka gutoza mu gice cya Kabiri ariko yisubiraho.

Nyuma y’umukino n’ubwo ikipe yatsinze, uyu mutoza yohereje umwungiriza we, Dusenge Sacha, mu kiganiro n’abanyamakuru kubera uburakari yari afite. Andi makuru avuga ko, Da Silva ashobora kuba yahise akuraho imyitozo yari iteganyijwe kuzakorwa ejo ku Cyumweru mu Nzove aho Rayon isanzwe yitoreza.

Hari andi makuru avuga ko, uyu mutoza yababajwe na bimwe mu bitarubahirijwe biri mu masezerano ye, aho bivugwa ko we yagombaga guhembwa amezi atatu ya mbere n’umushakira akazi [Manager we] ariko bikaba bitarakozwe.

Gusa kugeza ubu ntacyo ubuyobozi bwa Rayon Sports buratangaza kuri aya makuru yose ari kuvugwa ku mutoza mukuru w’iyi kipe. Muri Gashyantare uyu mwaka, ni bwo Jorge Manuel da Silva Paixão Santos yasinyiye amasezerano y’umwaka umwe Rayon Sports. Bivuze ko agiye kuyimaramo amezi ane.