Ikipe ya Real Madrid na FC Barcelone zatangiye igisa n’intambara zihanganira umunya-Norvège Erling Haaland ukinira ikipe ya Borussia Dortmund.
Ikinyamakuru SPORT cy’i Catalunya giheruka gutangaza ko Madrid yiteguye gutanga bwa nyuma igiciro cy’amafaranga yifuza kugura uyu rutahizamu ukiri muto kugira ngo ajye kuyobora ubusatirizi bwayo. Ni nyuma y’uko Carlo Anchelotti utoza iyi kipe ngo akomeje kugaragaza inyota yo kwegukana uyu mukinnyi w’imyaka 21 y’amavuko.
Sport iheruka gutangaza ko Florentino Perez uyobora Real Madrid aheruka guhurira na Mino Raiola uhagarariye Haaland mu biganiro bigamije kureba uko uriya munya-Norvège yaza muri Real Madrid. Iki kinyamakuru cyakora cyo kivuga ko n’ubwo Madrid yifuza uriya mukinnyi mukeba wayo FC Barcelona na yo ikomeje kumushakira kubura hasi no hejuru.
Amakuru avuga ko Joan Laporta uyobora FC Barcelona mu mpeshyi y’uyu mwaka yifuza kwishyura Borussia Dortmund release clause ya Haaland ingana na miliyoni 75 z’ama-Euro kugira ngo imwegukane.
Barcelona kandi ngo irifuza guha uyu musore umushahara wa miliyoni 20 z’ama-Euro ku mwaka ndetse ikanishyura andi nka yo nka Komisiyo y’abamuhagarariye. Kuri ubu bivugwa ko amakipe ya Manchester City, Chelsea na PSG na yo akomeje kwirukanka kuri uyu musore, gusa we ubwe yabwiye abamuhagarariye ko yifuza kwerekeza muri Espagne.
Erling Haaland kuva yagera muri Brusssia Dortmund mu myaka ibiri ishize avuye muri Red Bull Salzburg, yayikiniye imikino 57 ayitsindira ibitego 56.
About The Author
