Inka yakomotse mu za Perezida wa Uganda, Yoweri Museveni, yitwa Fafa iherutse kugurwa amashilingi miliyoni 491.5, angana n’amanyarwanda (Frw) miliyoni 140.
Iyi nka yo mu bwoko bwa Ankole yaguriwe mu cyamunara cyabereye mu rwuri rwa Perezida wa Afurika y’Epfo ruri mu gace ka Ntaba Nyoni kari mu majyaruguru y’igihugu, tariki ya 5 Werurwe 2022.
Nk’uko The New Vision ibivuga, iyi ni yo nka ya Ankole iguzwe amafaranga menshi, ikaba ikurikiwe n’imfizi yari ifite imyaka itanu y’amavuko yitwaga Mufasa yaguzwe amashilingi miliyoni 164.
Ubusanzwe muri Uganda, inka yo muri ubu bwoko ishobora kugura amafaranga menshi ntijya irenza amashilingi miliyoni 2 na miliyoni 2.5 ku mfizi.
Abahanga mu bworozi bw’inka za Ankole, bemeza ko guhenda kwazo guterwa n’uburyo zigaragara neza, amata meza zikamwa, inyama zazo, kuba zishobora kurama kugeza ku myaka 30 no kuba zishobora kuba ahantu hari ubwatsi n’amazi bike.
About The Author
