Minisiteri y’Ingabo muri Tunisia yavuze ko ku mugoroba ku wa Gatatu, kajugujugu ya gisirikare yari itwaye abantu bane yaburiwe irengero, nyuma y’aho ibyuma bigenzura indege ziri mu kirere bizwi nka ’radar’ biyibuze ubwo yari mu Majyaruguru ashyira i Burengerazuba bw’iki gihugu.
Itangazo ry’ibura ry’iyi ndege ryashyizwe hanze mu gitondo cyo kuri uyu wa Kane, tariki ya 8 Kamena 2023. Minisiteri y’Ingabo yavuze ko iyo kajugujugu yaburiwe irengero mu ijoro ryakeye ubwo yari igeze mu Gace ka Cap Serrat.
La Libre yanditse ko Minisiteri y’Ingabo ku bufatanye na Minisiteri y’Umutekano w’Imbere mu Gihugu ya Tunisia “hakorwa iperereza, haba ku butaka, mu mazi no mu kirere, kugira ngo hamenyekane irengero ry’indege n’abantu bane bari bayirimo”.
Isanganya nk’iri ryo kuburirwa irengero ry’indege si ubwa mbere ribayeho muri Tunisia. Mu Ukwakira 2021, abasirikare batatu baguye mu mpanuka ya kajugujugu y’ingabo ubwo bari mu myitozo ya nijoro mu Gace ka Gabès kari mu Majyepfo.
Icyo gihe Leta ya Tunisia yakoze iperereza ku mpamvu zateye iyo mpanuka ariko ibisubizo byayo na n’ubu ntibirashyirwa ahagaragara.
About The Author
