Ikipe ya Bayern Münich yamaze kumvikana na FC Barcelona ko igomba kuyigurisha umunya-Pologne Robert Lewandowski.
Umunyamakuru uzwiho gutangaza amakuru kuri transferi z’i burayi Fabrizio Romano yemeje ko amakipe yombi yageze ku bwumvikane ku munsi w’ejo. Bayern Munich yemeye kurekura Lewandowski nyuma yo guhabwa na Barça miliyoni 50 z’ama-Euro.
Iyi kipe yo mu Budage yari yabanje kwanga ubusabe butandukanye bwa Barça, burimo ubwa miliyoni 40 z’ama-Euro. Byitezwe ko nta gihindutse Lewandowski atangazwa ku mugaragaro nk’umukinnyi wa FC Barcelona kuri uyu wa Gatandatu nyuma yo gusinya amasezerano y’imyaka itatu.
Robert Lewandowski ari mu muryango winjira muri Barcelona mu gihe yari yanifujwe n’amakipe ya Chelsea na PSG. Aya makipe cyakora cyo aheruka kubwirwa ko gusinyisha uyu mukinnyi w’imyaka 33 y’amavuko bidashoboka, kuko yari amaze amezi ane yarumvikanye na Barça.
Ni nyuma yo gusaba Bayern Munich yari agifitiye amasezerano y’umwaka umwe kumurekura akajya gushakishiriza ahandi.
About The Author
