Ibyamamare nyarwanda mu ngeri zose bikomeje kugira ku mavi bisabira umuhanzi Yvan Buravan urembeye mu bitaro mu gihugu cya Kenya nyuma y’ibyumweru bibiri amazeyo.
Ibyumweru bibiri bigiye kwihirika umuhanzi Burabyo Yvan uzwi nka Yvan Buravan agiye kwivuriza muri Kenya indwara itaramenyekana. Amakuru agera avuga ko mbere yo kwerekeza muri Kenya yari amaze iminsi yitabwaho n’abaganga bo mu bitaro by’umujyi wa Kigali bya CHUK.
Kuva ku wa gatanu tariki 29 Nyakanga ibyamamare bitandukanye byiganjemo abahanzi n’abanyamakuru bakomeje kwifashisha imbuga nkoranyambaga zabo batambutsa ubutumwa buhumuriza Buravan mu bihe bitoroshye ari kunyuramo.
Umuhanzi Safi Madiba uri kubarizwa muri Canada abinyujije kuri Instagram yatangaje ko akomeje kugira ku mavi mugenzi we Buravan uri kubarizwa muri Kenya muri gahunda zo kwivuza.
Ati” Amasengesho yanjye yose akwerekeyeho muvandimwe Buravan “
Abanyamakuru bakomeye mu myidagaduro nyarwanda Phil Peter , Yago For Real na Lucky Nzeyimana biyongereye ku bindi byamamare byaragije Imana ubuzima bwa Yvan Buravan. Ni mu butumwa aba banyamakuru batambukije ku Instagram zabo basaba Rugira kwibuka uwo bise umuvandimwe mu bihe bitoroshye ari kunyuramo by’uburwayi.
Phil Peter (ISIBO TV) ati “ Uraza kumera neza vuba muvandimwe “ mu gihe Lucky (RBA) yagize ati “Imana iragukunda kandi irakuzi “ arenzaho kuyisaba kumusubizamo imbaraga.
Umunyamakuru Yago For Real yasabiye ubuzima burambye umuhanzi Buravan urembeye muri Kenya.
Abinyujije kuri Instagram Yago For Real yagize ati “Imana ikwimane muvandimwe Buravan. Amasengesho yanjye ari kuri wowe “.
Yago yashyize Burabyo mu biganza bya Rurema mu gihe hari amakuru avuga ko ubuzima bw’uyu muhanzi bukomeje kumera nabi kurushaho. Umuhanzi Bruce Melodie yifashishije urubuga rwa Instagram atangaza ko ari gusengera umuvandimwe Buravan ndetse yizeye ko aza kumera neza mu gihe cya vuba.
Naho Producer Element umaze iminsi mike atangiye umwuga w’Uburirimbyi yasabye RUREMA kumurindira umuvandimwe.
Ibi byamamare bije byiyongera ku bindi birimo Uncle Austin , Jado Max , Dj Kostar , Jules Sentore , Tizzon Prem babibumburiye abandi kumushyira mu biganza by’Imana.
About The Author
