Ubushinjacyaha ku rwego rwisumbuye rwa Huye bukurikiranye abagabo babiri bakekwaho gutaburura umurambo bagatwara bimwe mu bice by’umubiri.
Icyaha cyabaye mu ijoro ryo ku itariki ya 01 Werurwe 2022 mu irimbi riherereye mu mudugudu wa Cyumba, Akagari ka Nyamugari, Umurenge wa Nyanza ho mu Karere ka Gisagara, aho mu gitondo umurambo wataburuwe udafite bimwe mu bice byawo.
Iyi nkuru dukesha Ubushinjacyaha Bukuru ivuga ko mu gushakisha, hafashwe abagabo babiri, bavuga ko ari ikiraka bari bahawe, ko bawutaburuye bakoresheje amasuka n’ibitiyo, bagera ku isanduku, uwabahaye ikiraka (watorotse) agakuramo amagufwa amwe akayatwara bakaba babisabira imbabazi.
Icyaha cyo gutaburura umurambo w’umuntu no kuwucaho umwanya w’umubiri bakurikiranyweho kiramutse kibahamye buri wese yahanishwa igifungo kigera ku myaka 7, hashingiwe ku biteganywa n’ingingo y’130 y’itegeko no 68/2018 ryo ku wa 30/06/2018 riteganya ibyaha n’ibihano byabyo muri rusange.