Mu mikino ya shampiyona y’u Rwanda yakomezaga kuri uyu wa gatanu tariki 15 Mata 2022, Ikipe ya Gasogi United yatsinze ikipe ya Kiyovu Sports yari iyoboye urutonde rwa shampiyona n’amanota 50 irusha ikipe ya APR FC iyikurikiye amanota abiri gusa.
Ni umukino wabanje gushuha mbere yaho bitewe n’amagambo y’abayobozi b’aya makipe aho buri umwe yakubitaga urutoki ku rundi yizeza abafana ba buri kipe ko bari butahane insinzi ariko birangira Gasogi itahanye amanota atatu ku bitego 2-0.
Igitego cya mbere cya Gasogi United cyatsinzwe ku munota wa 43 w’igice cya mbere gitsinzwe na Malipangou kuri penalite. Aya makipe yakomeje gusatirana gusa ikipe ya Gasogi ikomeza gukoresha imipira ya contre-attack ari na byo byaje kuvamo igitego cya kabiri cya Gasogi cyatsinzwe na Djibrine Hassan Brahin.
Uyu mukino kandi waranzwe n’ishyaka rikomeye kuko mu minota ya nyuma habaye gushyamirana hagati ya Malipangou n’umuzamu w’ikipe ya Kiyovu Kimenyi Yves wahise ahabwa ikarita itukura ahita asohoka mu kibuga ndetse akazaba atazakina umukino Kiyovu izahura na Mukura Victory Sports.
Uyu mukino usize ikipe ya Kiyovu igumanye amanota 50 ndetse iyoboye urutonde rwa shampiyona mu gihe hagitegerejwe ibizava mu mukino uzahuza APR FC na Bugesera FC ku cyumweru, Gasogi kuri ubu ifite amanota 26 nyuma y’uyu mukino.
About The Author
