Ubushinjacyaha ku Rwego Rwisumbuye rwa Gasabo, bwakiriye dosiye y’umwana w’umukozi ufite imyaka 15 y’amavuko wishe umwana muto w’imyaka ibiri wo mu rugo yakoragamo.
Ibyo byabaye tariki ya 08/12/2024, ubwo uwo mwana w’umuhungu yicaga umwana bari bamusigiye nk’uko iyi nkuru dukesha Ubushinjacyaha Bukuru ivuga.
Uregwa yemera icyaha agasobanura ko yamunize akazana urufuzi, nyuma akagerageza kumuramiza amazi bikaba iby’ubusa, bikarangira umwana apfuye. Avuga ko yamuhoye ko yari yiyanduje.
Icyaha cy’ubwicanyi akurikiranyweho giteganywa kandi kigahanishwa ingingo ya 107 y’Itegeko no 68/2018 ryo ku wa 30/08/2018 riteganya ibyaha n’ibihano muri rusange nk’uko ryavuguruwe kugeza ubu. Iyo uwakoze icyaha ari umwana, hakurikizwa ibiteganwa mu ngingo ya 54 y’itegeko ryavuzwe haruguru.
About The Author
