Ubushinjacyaha ku rwego Rwisumbuye rwa Gasabo hagati muri iki cyumweru bwakiriye dosiye y’abagabo babiri bakekwaho kwica umwana muto nyuma bakamuta mu mazi .
Ni icyaha ubushinjacyaha Bukuru dukesha iyi nkuru buvuga ko cyakorewe mu Mudugudu wa Nyakabingo, Akagali ka Bweramvura, Umurenge wa Jabana, Akarere ka Gasabo, Intara y’Umujyi wa Kigali, ku itariki ya 01 Kamena 2023, aho abagabo babiri bishe umwana w’umuturanyi wabo, bamukuramo amaso, bamujugunya mu manga.
Iyi nkuru ivuga ko uwo mwana yabanje kubura nk’uko Nyirasenge wamureraga abivuga, akaba yarajyanywe n’umwe mu baregwa, nyuma waje gufatwa akemera ibyo we na mugenzi we bareganwa bakoze.
Yavuze ko banyweye urumogi bamaze kuruhaga bica uwo mwana, bakaba baramuhonze amabuye kugeza ashizemo umwuka, nyuma bagiye kwerekana aho bamushyize, bigaragara ko isura yangijwe ku buryo bukomeye.
Baramutse bahamwe n’icyaha cy’ubwicanyi bakurikiranyweho, bahanishwa igifungo cya burundu hashingiwe ku ngingo ya 107 y’ Itegeko nº 68/2018 ryo ku wa 30/08/2018 riteganya ibyaha n’ibihano muri rusange.
About The Author
