Ishyirahamwe ry’Umupira w’amaguru hano mu Rwanda (FERWAFA), ryakuyeho mpaga yaherukaga gutera ikipe ya Rwamagana City nyuma yo gusanga ikirego cya AS Muhanga yari yayireze nta shingiro gifite.
Rwamagana City yaherukaga kubwirwa na FERWAFA ko itagikinnye umukino wa ½ wa kamarampaka muri shampiyona y’icyiciro cya kabiri ishinjwa gukinisha umukinnyi ufite umuziro. Ni mu gihe iyi kipe yaherukaga kugera muri ½ cy’irangiza isezereye AS Muhanga.
Umukino ubanza iyi kipe y’umutoza Nsengiyumva François yari yaratsindiwe na Muhanga i Rwamagana igitego 1-0; mu wo kwishyura itsindira Muhanga i Gitarama ibitego 2-1. Ibi bivuze ko amakipe yombi yanganyaga igiteranyo cy’ibitego 2-2, gusa Rwamagana izamuka ibifashijwemo n’ibitego byinshi yinjirije i Muhanga.
Rwamagana yari yasezerewe nyuma yo kuregwa na AS Muhanga ivuga ko yakinishije umukinnyi wari ufite amakarita atatu y’umuhondo. Umunyamabanga Mukuru wa FERWAFA, Muhire Henry, yaherukaga gutangaza ko mu mukino ubanza Rwamagana yakinishije umukinnyi witwa Mbanza Joshua nyamara yari afite amakarita atatu y’umuhondo; ibyo iyi kipe yo mu Burasirazuba bw’u Rwanda yitaga ibinyoma.
Iyi kipe yaherukaga kwandikira FERWAFA iyisaba ko yakwemera ikayiha email na raporo y’umwimerere by’umusifuzi na komiseri igaragaza ko Mbanze Josua atahawe ikarita y’umuhondo yuzuza ikarita ya 3 ku mukino wa Nyagatare tariki ya 22 Gicurasi 2022, kuko abakinnyi bayihawe ari batatu: Uwayezu Jean de Dieu, Muganuza Jean Pierre na Habineza Samuel.
Iyi baruwa kandi ivuga ko umunyamabanga wa FERWAFA yavuze ko uyu mukinnyi yambara nimero 15 atari byo ko ahubwo yayambaye ku mukino umwe tariki ya 7 Ugushyingo 2022 bakina na Sunrise FC ari nabwo yahawe ikarita y’umuhondo ya 2, ubusanzwe yambara nimero 9.
FERWAFA nyuma yo gusanga yari yarenganyije Rwamagana City, yanzuye ko iyi kipe ari yo igomba gukina na Interforce mu mukino wa ½ cy’irangiza.
About The Author
