Manchester City yandagaje Leipzig iyitsinda ibitego 7-0, ihita inakatisha itike ya ¼ cy’irangiza mu mikino ya UEFA Champions League 2022/2023 nyuma y’igiteranyo cy’ibitego 8-1.
Manchester City yari yakiriye RasenBallSports Leipzig kuri Etihad Stadium mu mukino wo kwishyura wa ⅛ muri UEFA Champions League, nyuma y’uko banganyirije mu Budage mu mukino ubanza igitego 1-1.
Ku munota wa 18, Manchester City yakambitse imbere y’izamu rya Leipzig maze Rodrigo ateye n’umutwe Benjamin Hendricks akozaho ikiganza, umusifuzi yanzura ko ari penaliti yahise yunjizwa neza na Erling Braut Haaland ku munota wa 22.
Ku munota wa 23, Kevin De Bruyne yarekuye ishoti rikomeye cyane maze rifata ipoto umupira uvamo, usanga Haaland wari wamaze gusiga ba myugariro ba Leipzig ubundi ahita asunikiramo n’umutwe.
Ku munota wa 45+2, ku mupira wari uvuye muri koruneri, Rúben Dias yateye umupira n’umutwe ariko wanga kurenga umurongo maze Haaland agahirikira mu izamu ahita yuzuza bitatu bye wenyine.
Igice cya mbere cyarangiye Man City iyoboye n’ibitego 3-0, n’igiteranyo cya 4-1. Ku munota wa 49, Ilkay Güngogan yatsinze igitego cya kane nyuma yo guhabwa umupira na Jack Grealish.
Ku munota wa 53, Haaland yatsinze igitego cya gatanu. Ku munota wa 57, Manuel Akanji yahaye Haaland umupira maze atsinda igitego cye cya gatanu muri uyu mukino, agahigo asangiye na Lionel Messi na Luiz Adriano bonyine ko gutsinda ibitego 5 mu mikino yo gukuranamo (knockouts) ya UEFA Champions League.
Ku munota wa 90+2, Kevin De Bruyne yatsinze igitego cya 7 muri uyu mukino nyuma yo guhabwa umupira na Riyad Mahrez wari winjiye mu kibuga asimbuye Güngogan, maze De Bruyne akareba uko umuzamu wa Leipzig ahagaze ahita ashyira mu nguni y’ibumoso hejuru.
Ku rundi ruhande, kuri Estadio do Dragao muri Portugal, FC Porto yari yakiriye Inter Milan maze zinganya 0-0 bituma Inter Milan ikomeza muri ¼ kubera igitego 1 yatsindiye mu Butaliyani.
About The Author
