Muvunyi Paul wahoze ari Perezida wa Rayon Sports yatangaje ko ikipe imwe mu Rwanda ari yo batinya ndetse bakanubaha, ko ariko na yo Hari ubwo bayica mu rihumye bakayitwara igikombe.
Muvunyi yabitangaje ku wa Gatanu ubwo we na bagenzi be bagiye bayobora Rayon Sports basuraga abakinnyi b’iyi kipe mu myitozo biteguriragamo umukino w’umunsi wa karindwi wa shampiyona bahuriramo na Kiyovu Sports.
Rayon Sports iheruka gutwara igikombe cya Shampiyona muri 2018 ubwo Paul Muvunyi yari akiri Perezida wayo.
Akimara kuva ku buyobozi bw’iyi kipe yasimbuwe na Munyakazi Sadate, gusa bombi ntibigera bahuza ku buryo Murera yaje gucikamo ibice. Aba bagabo bombi icyakora bamaze kwiyunga ndetse ku wa Gatanu bari kumwe mu Nzove.
Bwana Paul Muvunyi yavuze ko icyongeye kubahuriza hamwe ari ukongera gutwara shampiyona, gusa yemera ko hari ikipe imwe mu Rwanda batinya ko ishobora kubabuza icyo gikombe.
Ati: “Ikipe mu Rwanda dutinya kandi twubaha ni imwe, ariko na yo irabizi ko tuyiciye mu rihumye igikombe tugitwara. N’ubu ni ko tuzabigenza, turagarutse kandi igikombe n’ubu turagitwara.”
Kugeza ubu Rayon Sports mbere yo kwesurana na Kiyovu Sports iri ku mwanya wa kane n’amanota 11 yabonye mu mikino itanu.
Murera irarusha amanota arindwi mukeba wayo APR FC we umaze gukina imikino ibiri yonyine.
Ni APR FC imaze gutwara ibikombe bitanu yikurikiranya, kuri iyi ncuro ikaba iri gushaka icya gatandatu.
About The Author
