Ikibazo cya Diamond na Mico The Best cyari kimaze imyaka itari mike cyamaze kurangira nyuma y’aho Diamond ufite izina rikomeye mu Karere ka Afurika y’Iburasirazuba yemeye kwishyura ideni ryose yari afitiye mugenzi we.
Amakuru yizewe agera kuri IGIHE dukesha iyi nkuru, avuga ko ubuyobozi bwa Wasafi bwatangiye kwegera Mico The Best kuva ku wa 3 Kanama 2023, icyakora ku wa 9 Kanama 2023 nibwo umujyanama wa Diamond yageze i Kigali abonana n’uyu muhanzi mu rwego rwo kurangiza ikibazo bari bamaze igihe bafitanye.
Uwaduhaye amakuru yavuze ko ubwo Babu Tale yahuraga na Mico The Best, yamuganirije ku ngaruka byamugiraho mu gihe baba badakemuye iki kibazo mu gihe nyamara babigizemo ubushake cyakemuka mu mahoro.
Mico The Best na we mu biganiro yagiranye na Babu Tale yagerageje koroshya ikibazo kugira ngo kirangire mu mahoro, ari na ko byaje kugenda mbere y’uko uyu mugabo asubira muri Tanzania gutegura urugendo rw’umuhanzi we ugomba gutaramira i Kigali ku wa 13 Kanama 2023.
Nubwo bitazwi neza umubare w’amafaranga Mico The Best yishyuwe, amakuru y’ibanze ahari ahamya ko yaba yarasubijwe ayo yatanze kuri Diamond angana hafi na miliyoni 7 Frw.
Ni amafaramga Mico The Best yahaye Diamond mu 2013 ubwo uyu muhanzi yagombaga kwitabira igitaramo yakoreye i Gikondo ariko bikarangira atabashije kuhagera.
Hari amakuru avuga ko Babu Tale yari i Kigali mu biganiro byo kureba uko Mico yakuraho ikirego yari yatanze kuri Diamond ndetse bakarebera hamwe uko bamwishyura ayo yabahaye hatagiyeho inyungu ya miliyoni 10Frw nk’uko yari yayaregeye.
Mu Ukuboza 2022 nibwo inkuru zo kwishyuza Diamond zongeye kuzamuka mu itangazamakuru, nyuma y’uko Mico The Best amuregeye Urwego rw’Igihugu rw’Ubugenzacyaha (RIB).
Icyakora nubwo yari yamureze azi ko uyu muhanzi azataramira i Kigali, byarangiye atahageze bituma yiyemeza gukomeza kumukurikirana no muri Tanzania.
Aba bahanzi batangiye kugirana ibibazo nyuma yo kugerageza kwishyuza Diamond ntamwumve, Mico The Best wari ukibitse inyandiko zose zijyanye n’ibyo yahombye kubera icyo gitaramo, yisunze Federasiyo ya muzika mu Rwanda ayisaba ko yakorana n’ihuriro ry’abahanzi muri Tanzania mu kumwishyuriza.
Ni ibintu bitagize icyo bitanga kuko ibaruwa (IGIHE ifitiye kopi) Federasiyo y’abahanzi bakora umuziki mu Rwanda yandikiye ihuriro ry’abahanzi muri Tanzania itigeze isubizwa.
Akimara kumva ko Diamond agiye gutaramira i Kigali umwaka ushize, Mico The Best abifashijwemo na KIKAC Music yarebereraga inyungu ze bahise batanga ikirego bundi bushya basaba ko mu gihe uyu muhanzi yaba ageze i Kigali yabanza kumwishyura.
Ni ikirego Mico The Best yatanze abimenyesha Minisiteri y’Ububanyi n’Amahanga, Urwego rw’Igihugu Rushinzwe Abinjira n’Abasohoka ndetse na Ambasade ya Tanzania mu Rwanda.
About The Author
