Umutoza wa APR FC, Darko Nović, yacyeje umunyezamu w’ikipe y’abagore, Maombi Joanna amusezeranya kuzamutumira mu myitozo akigisha abanyezamu be kuvugana n’abakinnyi.
Ku wa Gatandatu, tariki 5 Ukwakira 2024, APR WFC yongeye gukina umukino mu Cyiciro cya Mbere nyuma y’imyaka 11, aho yatunguye AS Kigali WFC bakanganya ibitego 2-2.
Uyu mukino wakurikiwe na Chairman wa APR FC, Col (Rtd) Richard Karasira wari kumwe n’abatoza b’ikipe y’abagabo, Darko Nović n’umwungiriza we.
Ni umukino Ikipe y’Ingabo yatunguranye inganya na AS Kigali isanzwe ari ubukombe muri iki cyiciro, nyamara yo ari ikipe y’abakinnyi bakiri bato b’abanyeshuri bakiga mu mashuri yisumbuye.
Nyuma y’umukino, Umutoza Darko Nović yashimye ishyaka aba bakinnyi bagaragaje.
Yagize ati “Mwitwaye neza cyane mwatangiye umukino ngirango ni iby’iminota mike ariko niko mwawusoje. Nakunze uburyo mutarekura mukomeza guhatana.”
By’umwihariko uyu mutoza yashimye umunyezamu Maombi Joanna kubera ukuntu azi kuvugana n’abakinnyi.
Ati “Witwaye neza. Nzagutumira i Shyorongi (aho ikipe y’abagabo ikorera imyitozo) wigishe abanyezamu banjye kuvugana n’abakinnyi.”
Umunyezamu Maombi ni umwe mu bagize umukino mwiza kuko yakuyemo imipira myinshi yaterwa na barutahizamu ba AS Kigali WFC. Ni umukinnyi ukiri muto utanga icyizere kuko yiga mu mwaka wa kabiri w’amashuri yisumbuye.
APR WFC izasubira mu kibuga yakira Inyemera WFC mu mukino w’Umunsi wa Kabiri wa Shampiyona uteganyijwe tariki 12 Ukwakira 2024 kuri Stade Kamena i Huye.
About The Author
