Rutahizamu w’ikipe y’igihugu ya Portugal na Al Nassr yo muri Arabia Saudite, Christiano Ronaldo yavuze ko ikipe ya Arsenal itari butware igikombe cya shampiyona y’icyiciro cya mbere mu Bwongereza cya 2023-2024, amahirwe asigarana Manchester City gusa.
Kuri iki Cyumweru saa kumi n’imwe zuzuye nibwo hari bukinwe imikino isoza shampiyona y’icyiciro cya mbere mu Bwongereza ya 2023-24.
Ahari urugamba rukomeye ni ku ikipe iri butware igikombe, ikipe ya Manchester City iyoboye urutonde rwa shampiyona n’amanota 88 iraba yakiriye West Ham United kuri Etihad Stadium isabwa kuyitsinda gusa kugira ngo icyegukane.
Arsenal yo ya kabiri ku rutonde rwa shampiyona n’amanota 86 iraba yakiriye Everton kuri Emirates Stadium isabwa kuyitsinda ubundi Manchester City igatsindwa cyangwa ikanganya kugira ngo gutwara igikombe bishoboboke.
Ku munsi w’ejo ku wa Gatandatu ubwo kizigenza Cristiano Ronaldo yari yagiye i Riyadh muri Arabia Saudite kureba umukino w’iteramakofe wari wahuje Tyson Fury na Oleksandr Usyk, yahuye n’umufana ukomeye wa Arsenal witwa Frank Warren.
Uyu mufana yamubwiye ko bamutegereje mu ikipe yabo ya Arsenal gusa uyu munyabigwi w’umupira w’amaguru araseka, arangije avuga ko ikipe ya Arsenal itari butware igikombe cya shampiyona.
Ubwo bivuze ko Cristiano Ronaldo we abona Manchester City ariyo iri bwegukane igikombe cya shampiyona cya 4 yikurikiranya.
Ntabwo uyu mufana wa Arsenal,Frank Warren ariwe ubwiye Cristiano Ronaldo ibintu byo kujya mu ikipe ya Arsenal kuko n’umunyamakuru Piers Morgan uyifana mu minsi yashize yavuze ko aramutse ayigiyeno yatsindira nibura ibitego 25 muri shampiyona.
About The Author
