Perezida Paul Kagame , yashyizeho abayobozi barimo Dr Musafiri Ildephonse wagizwe Minisitiri w’Ubuhinzi n’Ubworozi, asimbura Dr Gerardine Mukeshimana ukuwe kuri uyu mwanya umaze imyaka igera ku munani muri iyi minisiteri.
Muri iri tangazo ryaturutse mu biro bya Minisitiri w’intebe kuri uyu wa kane tariki ya 2 Werurwe 2023 , rikomeza rivuga ko Dr. Thelesphore Ndabemeye yagizwe umuyobozi mukuru w’Ikigo cy’Igihugu gishinzwe Ubuhinzi n’Ubworozi (RAB), uyu akaba asimbuye Dr Alexandre RUTIKANGA wari utaramaraho n’ukwezi kumwe kuri uyu mwanya dore ko yemejwe nk’umuyobozi wa RAB tariki 6 Gashyantare 2023 n’umutwe wa Sena.
Uwitwa Clarisse Umutoni yagizwe umuyobozi mukuru ushinzwe imari (Chief of Financial Office) mu kigo cy’Igihugu gishinzwe Ubuhinzi n’Ubworozi (RAB).
Impinduka muri minisiteri y’ubuhinzi zibaye mu gihe hirya no hino mu gihugu abatari bake bataka inzara, izamuka ry’ibikomoka ku buhinzi, ifumbire n’imbuto bitabonekera igihe ku bahinzi, ndetse n’igihigwa cya chia seeds kimaze iminsi kigarukwaho mu itangazamakuru n’abataka guhomba akayabo bashoye, kugeza n’ubwo n’umukuru w’igihugu yabigarutseho mu nama y’umushyikirano 23 ku mpamvu zuko hari abakomeje gutabaza bafuga ko batekewe umutwe.
About The Author
