Rutahizamu w’ikipe ya APR FC Byiringiro Lague biravugwa ko yamaze kumanurwa mu Ntare, nyuma y’igihe adatanga umusaruro yari yitezweho muri APR FC.
Amakuru avuga ko uyu rutahizamu usatira izamu aciye ku mpande yamaze koherezwa gukorera imyitozo mu Ntare, asanzeyo Nsanzimfura Keddy na we woherejweyo mu kwezi gushize.
Kuri ubu APR FC ikomeje kwitegura umukino ubanza w’ijonjora ry’ibanze muri CAF Champions league ugomba kuyihuza na US Monastir yo muri Tunisia, gusa aba bakinnyi bombi ntibari mu bakinnyi bari kuwitegura.
Umutoza Mohammed Adil Erradi ngo ni we wafashe icyemezo cyo kohereza Lague mu ntare, nyuma yo kutishimira urwego rw’imikinire asigaye ariho.
Uyu musore ukiri muto ni umwe mu bakinnyi bagenderwagaho na APR FC mu myaka yashize ndetse banatanga icyizere, gusa urwego rwe ruza gusubira inyuma kuva mu mpera z’umwaka ushize ubwo yari amaze gukora ubukwe.
APR FC idafite Lague biteganyijwe ko kuri uyu wa Kabiri ari bwo itangira umwiherero mu karere ka Huye, yitegura US Monastir bagomba kuhahurira mu mukino ubanza uzaba ku wa Gatandatu tariki ya 10 Nzeri.
About The Author
