Ingabo z’u Burusiya ziherutse gufata Abanyamerika babiri ba mbere barwaniraga Ukraine mu ntambara imaze amezi atatu.
Aba Banyamerika: Robert Drueke w’imyaka 39 y’amavuko na Andy Huynh w’imyaka 27 bafatiwe mu mirwano yabereye mu karere ka Kharkiv mu cyumweru gishize nk’uko ikinyamakuru Daily Mail kibisobanura.
Abavugizi b’ibiro bya Leta Zunze Ubumwe za Amerika (USA) bishinzwe ububanyi n’amahanga ndetse n’ibiro by’Umukuru w’Igihugu, The White House, bemeje ko bamenye amakuru y’ifatwa ry’aba barwanyi, gusa birinda kubivugaho byinshi.
Umubyeyi wa Drueke utuye muri Leta ya Alabama yabwiye iki kinyamakuru ko yavuganye na Ambasade, imwizeza ko umuhungu we azarekurwa. Ati: “Ambasade ya US yanyijeje ko igiye gukora ibishoboka kugira ngo imubone kandi bamushaka akiri muzima, atapfuye.”
Aba Banyamerika bafashwe nyuma y’Abongereza bafatiwe mu karere ka Mariupol muri Mata 2022: Aiden Aslin na Shaun Pinner, hamwe n’umunya-Maroc, Brahim Sadoun.
Aba barwanyi bashyikirijwe ubutegetsi bwa Leta ya Donetsk buharanira ubwigenge bwayo, baherutse gukatirwa igihano cy’urupfu, gusa ntikirashyirwa mu bikorwa mu gihe hakomeje ibiganiro mu rwego rwa dipolomasi.
About The Author
