Bruce Melodie uri mu bahanzi bagezweho muri iyi minsi mu muziki w’u Rwanda, nyuma yo kugera i Lagos yishongoye bikomeye ku bamaze iminsi bamwatsaho umuriro hamwe n’ikipe bakorana babashinja gukoresha amafaranga bagahindanya amazina y’abahanzi bakuru kuri we.
Uyu muhanzi uri kubarizwa muri Nigeria abinyujije ku rukuta rwe rwa Twitter yifashishije ifoto yicaye ku biro bya MTV Base West, arangije agira ati “Dore ngaha aho tugeze twica umuziki nyarwanda!”
Ni ijambo rimeze nko kwishongora ku bamaze iminsi bamwotsaho igitutu we n’umushoramari umufasha mu muziki Coach Gael bashinjwaga kwishyura abantu ngo baharabike amazina y’abahanzi bakuru nka The Ben na Meddy.
Abotsaga igitutu Bruce Melodie bamushinjaga gushaka kwitendeka ku mazina y’aba bahanzi bamubanjirije akabanza kuyahindanya kugira ngo asigare ari we zina ryera mu muziki w’u Rwanda. Bashinjaga kandi Coach Gael gushora amafaranga muri uyu mugambi wo gushaka gusenya amazina y’aba bahanzi bakuru yubaka iry’uwo bakorana.
Icyakora ni inkuru aba bombi bakunze guhakana kugeza ubwo mu minsi ishize Producer Madebeats bahoze bakorana ndetse akaba n’umunyamigabane muri 1:55 AM Ltd yabibashinje amagambo agashira ivuga.
Aba bagabo baje kumva igitutu cy’abafana kugeza ubwo Bruce Melodie yerekezaga muri Nigeria, mu gusangiza abamukurikira amashusho y’uko agiye, akifashisha indirimbo ‘Why’ ya The Ben na Diamond. Uyu muhanzi kuri ubu ari kubarizwa i Lagos aho yakiriwe na DJ Neptune ndetse akaba akomeje ibikorwa bitandukanye birimo gusura ’MTV Base West’.
Uretse ibi bikorwa, mu ijoro ryo ku wa 21 Mata 2023, Bruce Melodie wajyanye na Coach Gael na Element babashije kwitabira igitaramo cyo kumurika indirimbo ‘Count your blessings’ ya DJ Neptune na Spyro.
About The Author
