Umunyabigwi w’Umunye-Congo wagacishijeho mu Rwanda mu makipe akomeye nka APR FC na Rayon Sports, Bokota Kamana Labama, yagizwe Umutoza wungirije wa Addax SC yahoze yitwa Rugende FC iherutse kugurwa na Mvukiyehe Juvénal wegejweyo n’Umuryango Kiyovu Sports.
Bokota wasinye amasezerano y’umwaka umwe yahise atangira akazi ndetse yakoresheje imyitozo yo ku wa Kabiri, tariki 24 Ukwakira 2023 ku Kibuga cya Rugende FC.
Bokota w’imyaka 38 yamenyekanye cyane mu Rwanda ubwo yakiniraga Rayon Sports mu 2005 nyuma y’imyaka itatu yerekeza muri APR FC yakiniye umwaka umwe. Yakomereje muri Motema Pembe y’iwabo mbere yo gusubira muri Rayon Sports. Yanakiniye Kiyovu Sports, URA FC yo muri Uganda, AS Muhanga na Musanze FC.
Uyu rutahizamu wanditse amateka mu Rwanda, yanakiniye Ikipe y’Ighugu, Amavubi guhera mu 2007.
Mu 2010, Bokota yavuye muri APR FC yirukanywe ndetse anahagarikwa n’Ishyirahamwe Nyarwanda rya Ruhago, FERWAFA, umwaka adakina nyuma y’uko byatahuwe ko yakiniye amakipe abiri yo mu bihugu bibiri bitandukanye mu minsi ibiri gusa.
Aha hari nyuma yo kugaragara mu mukino wa Shampiyona ya RDC mu Ikipe y’i Kisangani yitwa Teout Solida Maleketa nyuma y’umunsi umwe agahita agera i Kigali akinjira mu kibuga asimbuye mu gice cya kabiri mu mukino w’ijonjora rya kabiri rya CAF Champions League Ikipe y’Ingabo z’Igihugu yatsinzemo TP Mazembe igitego 1-0 kuri Stade Amahoro.
Addax Sports Club yo mu cyiciro cya kabiri yahatanirwaga n’abagabo bane barimo babiri bamenyerewe cyane mu mupira w’u Rwanda ari bo bo Mvukiyehe Juvénal na Munyakazi Sadate wahoze ayobora Rayon Sports. Iyi kipe isanzwe itozwa na Ndemeye Jean Luis ‘Fils’ wari usanzwe afite amasezerano y’imyaka ibiri.
Byitezwe ko Addax Sports Club izongeramo abakinnyi bakomeye ndetse basanzwe bafite amazina kugira ngo bayizamure mu Cyiciro cya Mbere bidatinze.
About The Author
