Perezida wa Repubulika, Paul Kagame, yatangiye uruzinduko rw’iminsi ine mu Ntara z’Amajyepfo n’Iburengerazuba, guhera kuri uyu wa Kane tariki ya 25 kugeza tariki ya 28 Kanama 2022, aho biteganyijwe ko ku ikubitiro ahura n’abaturage bo mu Karere ka Ruhango na Nyamagabe mu Ntara y’Amajyepfo ndetse na Karongi na Nyamasheke mu ntara y’Iburengerazuba.
Biteganyijwe ko Perezida Kagame azanasura umukecuru witwa Rachel Nyiramandwa ubu ufite imyaka 110 y’amavuko, utuye mu Karere ka Nyamagabe, bari bamaze imyaka 12 badahura dore ko baherukanaga muri 2010.
Icyo gihe Nyiramandwa yashimiye Perezida Kagame kubera gahunda za Leta zo gufasha abatishoboye n’abageze mu zabukuru, aho yamushimiye ko yamwubakiye inzu, n’uburyo gahunda ya Girinka Munyarwanda yatumye abona amata akabasha gukomeza kubaho neza mu zabukuru.
Perezida wa Repubulika azasoreza uruzinduko rwe mu Karere ka Karongi mu Ntara y’Iburengerazuba, aho azasura uruganda rw’icyayi rwa Rugabano, rufite ubushobozi bwo gutunganya Toni 1.000 z’icyayi ku mwaka.
About The Author
