Mu mikino ya CAF Confederation Cup ihuhuza amakipe yatwaye ibikombe by’igihugu ku mugabane w’Afurika, ikipe yo mu mujyi wa Kigali ya AS Kigali yari yakiriye ikipe yo mu gihugu cya DR Congo.
Ni ikipe ya Darling Club Motema Pembe yo muri repubulika iharanira demokarasi ya Congo mu mujyi wa Kinshasa aho umukino wahuzaga aya makipe yombi uje kurangira ikipe ya AS Kigali itsinzwe ibitego 2 kuri 1.
Ni umukino iyi kipe ya AS Kigali yatangiranye intege nke dore ko muri ibyo bitego bibiri byose yabitsinzwe mu gice cya mbere cy’uyu mukino igice kihariwe n’iyi kipe yo muri Congo.
Mu gice cya kabiri abasore ba Eric Nshimiyimana baje bariye amavubi si ugukina karahava si uguhusha ibitego abasore barahusha ariko baza kubona igitego kimwe ari nacyo rukumbi iyi kipe igize impamba izerekeza muri Congo mu mukino wo kwishura ifitanye na DCMP ku itariki ya 24 Ukwakira 2021.
AS Kigali irasabwa gutsinda iyi kipe byibura ibitego bibiri ku busa dore ko yatsindiwe iwayo ibitego bibiri, iramutse itsinze bibiri ku busa ubwo igiteranyo cy’imikino yose cyaba ari 3 bya AS Kigali kuri 2 bya DCMP.
UEFA yakuye kubara ibitego byo hanze ku makipe ari mu marushanwa aho igitego cyo hanze kidahabwa agaciro gusa, CAF yo ntabwo yari yemeza iri tegeko aho igitego cyo hanze kigifite agaciro ku mugabane w’afurika.
About The Author
