Mu mikino ya shampiyona y’u Rwanda yakomezaga kuri uyu wa gatandatu wasize ikipE Y’Ingabo z’Igihugu ya APR FC igumye ku mwanya wa mbere n’ubwo iri guhatana n’ikipe ya Kiyovu Sports banya amanota.
Ikipe ya APR FC yari yahuye na Gasogi United kuri sitade ya Kigali i Nyamirambo aho yaje gutsinda Gasogi ibitego bibiri ku busa (2-0). APR FC yasatiraga cyane, yafunguye amazamu ku munota wa 10 ku gitego cyinjijwe na Mugisha Gilbert nyuma y’umupira watakajwe na myugariro wa Gasogi United, Yamini Salumu.
Théodore Christian Malipangu yahushije uburyo bukomeye bwashoboraga guhesha Gasogi United kwishyura, ku mupira yateye ugakubita umutambiko w’izamu mbere yo kwidunda hasi ugakurwaho n’abakinnyi ba APR FC.
Mu minota ya mbere y’igice cya kabiri, APR FC yabonye uburyo bubiri bukomeye, umupira wa mbere watewe na Manishimwe Djabel n’umutwe ujya hejuru y’izamu mu gihe ishoti rikomeye ryatewe na Mugisha Gilbert ryakuwemo na Cuzuzo Gaël wahise yitabwaho n’abaganga.
Ku munota wa 89 ni bwo APR FC yabonye igitego cya kabiri cyinjijwe na Ishimwe Anicet n’umutwe ku mupira wari uvuye muri koruneri yatewe na Omborenga Fitina. Ubu buryo bwabonetse nyuma y’umupira wakuwemo na Cuzuzo nyuma yo guterwa na Mugisha Bonheur.
Gutsinda uyu mukino byatumye APR FC ikomeza kuba ku mwanya wa mbere n’amanota 44, iyanganya na Kiyovu Sports yatsindiye Musanze FC iwayo ibitego 2-1. Ikipe y’Ingabo izigamye ibitego 18 mu gihe Urucaca ruzigamye 15.
Mu yindi mikino yabaye kuri uyu wa Gatandatu, Mukura Victory Sports yagize amanota 36 ku mwanya wa gatatu nyuma yo gutsinda Bugesera FC ibitego 2-0, Gicumbi FC inganya na Gorilla FC igitego 1-1 mu gihe Rutsiro FC yatsinzwe na Marines FC igitego 1-0.
Ku munsi w’ejo ku Cyumweru hateganyijwe imikino itatu aho Police FC izakina na AS Kigali, Etoile de l’Est yakire Rayon Sports mu gihe Etincelles FC izahura na Espoir FC.
About The Author
