Ikipe ya APR FC yanyagiye Rutsiro FC ibitego 6-1, ihamya umwanya wa mbere ari na ko ikomeza gushimangira ko ikomeje guhatanira igikombe cya shampiyona y’uyu mwaka.
Iyi kipe y’Ingabo yari yakiriye Rutsiro FC kuri Stade y’Akarere ka Bugesera, mu mukino w’umunsi wa 22 wa shampiyona y’u Rwanda wabaye kuri uyu wa Gatandatu tariki 4 Werurwe. Ni umukino yaje gukina uyu mukino iri ku mwanya wa mbere ndetse inameze neza kuko yatsinze imikino ine yose ishize, nyuma yo gutsindirwa na mucyeba wayo Rayon Sports i Huye.
Ibi byatumye iyi kipe y’ingabo z’igihugu iza yakoze ku bakinnyi bayo 10 muri 11 bakomeye isanzwe ibanzamo; kuko Ishimwe Christian yari ari mu mwanya wa Niyomugabo Claude byatumye APR FC itangira isatira bikomeye cyane ndetse iniharira umupira.
Ku munota wa 9, Ruboneka Jean Bosco yaje gutsinda igitego cya mbere ku ishoti riremereye yari ateye maze umuzamu wa Rutsiro FC ntiyabasha kuwukuramo, APR itangira kuyobora ubwo.
Ku munota wa 31, Myugariro w’iburyo, Ombolenga Fitina yacitse ba myugariro ba Rutsiro FC maze abinjirana mu rubuga rw’amahina yandika igitego cya gatatu cya APR FC ku mupira utagira uko usa yahawe na Niyibizi Ramadhan, biyizamurira icyizere cy’amanota atatu y’uyu munsi.
Ku munota wa 40, bidatinze rutahizamu Bizimana Yannick usigaye yaragize gutsinda akamenyero, yongeye kubona inshundura ku mupira mwiza yari ahawe na Ombolenga Fitina ku kazi gakomeye kari gakozwe na Ruboneka Jean Bosco.
Igice cya mbere cyarangiye APR FC iyoboye n’ibitego 3-0.
Ku munota wa 46 gusa, Bizimana Yannick yongeye kunyura kuri ba myugariro ba Rutsiro batitwaye neza muri uyu mukino maze atsindira APR FC igitego cya 4. Ku munota wa 46, nyuma y’amasegonda make gusa Niyibizi Ramadhan yatsindiye APR FC igitego cya gatanu i Bugesera bikomeza kuyoberana.
Ku munota wa 47, Rutsiro na yo yerekanye ko ntawusangira n’udakoramo maze itsinda igitego cy’impozamarira kuri penaliti gitsinzwe na Nizeyimana.
Ku munota wa 54, APR FC na yo yabonye penaliti maze yinjizwa neza na rutahizamu Nshuti Innocent umuzamu Musikina Delphin ayoberwa uko bigenze, ibitego bikomeza kuba imvura yabyo kuri Sitade y’Akarere ka Bugesera.
APR yahise itangira gutwara umukino gake binyuze kuri Ishimwe Anicet winjiye mu kibuga asimbuye, kugera urangiye iyoboye n’ibitego byayo 6-1. Ibi byatumye Abakinnyi baAPR biyongerera amahirwe yo kuzaba mu bo Carlos Alos utoza Amavuzi azatekerezaho.
APR yahise igumana umwanya wa n’amanota 46 irusha abiri Kiyovu Sports yafashe umwanya wa kabiri nyuma yo gutsinda Police FC ibitego 2-1. Irarusha kandi amanota ane Rayon Sports itarakina umunsi wa 22 izahuramo na Etincelles FC.
About The Author
