Mu mikino ya shampiyona y’u Rwanda y’umunsi wa 15 yakomezaga kuba kuri uyu wa gatanu tariki ya 28 Mutarama 2022, amakipe abiri y’ingabo z’igihugu yitwaye neza atahana amanota atatu.
Mu mukino wahuje ikipe ya APR FC na Police FC wabereye i Nyamirambo ikipe ya Police yatsinzwe ibitego 2-1, mu gihe ikipe ya Police ari yo yabanje igitego cya mbere mu gice cya mbere aho ari abakinnyi ba APR Fc ari bo bakitsinze.
Mu gice cya mbere ikipe ya Police yihariye umupira ari nabwo yaje gutsinda igitego cya mbere ndetse bakaba bagiye batera ama poto ku buryo yahushije ibitego bigera nko muri bibiri mu gice cya mbere. APR FC yaje gukora impinduka mu busatirizi bwayo aho yakuyemo Tuyisenge Jack wari uyoboye ubusatirizi hakajyamo Ishimwe Annicet waje guhindura ibintu mu gice cya kabiri.
Igice cya kabiri, ikipe ya APR FC yaje yariye karungu aho yaje kwishura igitego kimwe ndetse ikayitsinda ikindi cya kabiri ari na ko byaje kurangira ari ibitego 2-1, ikaba iraye ku mwanya wa mbere n’amanota 31, ikurikiwe na Kiyovu ifite amanota 29 dore ko yaje gutsindwa na Marines i Rubavu igitego 1-0.
Uyu wari umunsi wa nyuma w’imikino ibanza dore ko imikino yo kwishura izatangira tariki ya 12 Gashyantare 2022.
About The Author
