Raphaël Varane na Ibrahima Konaté biyongereye kuri Adrien Rabiot, Dayot Upamecano na Kingsley Coman mu bakinnyi bashidikanywaho ku mukino wa nyuma w’Igikombe cy’Isi uzahuza iki gihugu na Argentine, ku Cyumweru tariki 18 Ukuboza 2022, kubera virusi y’ibicurane yibasiye abakinnyi b’iki gihugu.
Amakuru ava mu Ikipe y’Igihugu y’u Bufaransa avuga ko aba bakinnyi bose batewe na virusi y’ibicurane iri kubafata bagacika intege umubiri wose.
Iyi virusi yinjiye muri iyi kipe bwa mbere ifata Coman we kugeza ubu washyizwe mu kato, ariko ikomeje gusakara mu bandi nka Upamecano na Rabiot batakinnye umukino wa ½ ubwo batsindaga Maroc ibitego 2-0.
Kugeza ubu, mu myiteguro y’umukino wa nyuma biravugwa ko Varane na Konate nabo bafashwe, bityo bategereje ibizamini bya nyuma byo kugena niba bazaboneka kuri uyu mukino w’amateka.
Umutoza w’Ikipe y’Igihugu y’u Bufaransa, Didier Deschamps yahise afata ingamba zikomeye zirimo gukaraba intoki kenshi ndetse no guhana intera hagati y’abakinnyi.
Umukino wa nyuma w’Igikombe cy’Isi uteganyijwe ku Cyumweru tariki 18 Ukuboza saa kumi n’imwe z’umugoroba. Ni umukino ukomeye cyane kuko amakipe yombi yifuza inyenyeri ya gatatu cyangwa gutwara Igikombe cy’Isi ku nshuro ya gatatu.
About The Author
