Ikipe y’Igihugu ’Amavubi’ yatsinze Super Eagles ya Nigeria ibitego 2-1, gusa ibura itike yo kuzakina imikino y’Igikombe cya Afurika cya 2025 ku munota wa nyuma.
Nigeria yari yakiriye u Rwanda mu mukino wa nyuma wo mu tsinda D wabaye kuri uyu wa Mbere. Ni umukino umutoza Torsten Frank Spittler n’abasore be basabwaga gutsinda, gusa ariko bagasenga ko Libya itsinda Bénin basaga n’abarwanira itike.
Ni nyuma yo gukora ikosa ryo gutsindwa na Libya igitego 1-0, mu mukino wabereye kuri Stade Amahoro mu cyumweru gishize.
Nigeria yari yakinishije ikipe yiganjemo iya kabiri yafunguye amazamu ku munota wa 59 w’umukino ibifashijwemo na rutahizamu Samuel Chukueze.
Amavubi yagarutse mu mukino ku munota wa 72 biciye kuri myugariro Mutsinzi Ange Jimmy, ku mupira yari ahawe na Kwizera Jojea.
Igitego cy’intsinzi cyabonetse ku munota wa 75 biciye kuri rutahizamu Nshuti Innocent; ibyatumye Amavubi yandika amateka yo gutsindira bwa mbere Nigeria iwayo.
Iyi kipe icyakora yabuze itike ya CAN izabera muri Maroc nyuma yo kurangiza imikino yo mu tsinda ku mwanya wa gatatu n’amanota umunani.
Ni amanota inganya na Bénin yaguye miswi na Libya 0-0, gusa bagatandukanwa n’uko Amavubi afite umwenda w’ibitego bibiri mu gihe Benin nta gitego yari izigamye cyangwa ngo igire icyo yari irimo nk’umwenda.
About The Author
