Ku mbuga nkoranyambaga abantu benshi bakomeje kwibaza ku myitwarire y’umutoza mukuru w’ikipe ya APR FC Muhammed Adil nyuma y’ibintu byinshi bikomeje kumuvugwaho ndetse byagera ku mafoto ari gusoma umusifuzi bikaba akarusho kurushaho.
Ibi bintu bidasanzwe byabereye kuri sitade ya Kigali i Nyamirambo ku cyumweru tariki 15 Gicurasi 2022, ubwo ikipe ya APR FC yari yahuye na Kiyovu Sports mu mukino w’ishyiraniro wa Shampiyona y’icyiciro cya mbere hano mu Rwanda.
Wari umukino ubereye ijisho kandi unakomeye ku mpande zombi gusa waje kurangira ikipe ya Kiyovu iwutsinze ku bitego 2-1 cya APR.
Muri uyu mukino wagaragayemo agashya aho umutoza Adil yakomeje kujya ashaka kuva mu kibuga cye nk’umutoza ariko agakomeza kwigizwa inyuma n’umusifuzi wa kane Rurisa Patience ari na ko amuha n’amabwiriza amwihanangiriza ko nakomeza arahabwa ikarita.
Uyu mutoza yarakomeje biba ngombwa ko ahabwa ikarita y’umuhondo na Ishimwe Jean Claude wari uyoboye umukino ariko nyuma yo kumwereka ikarita Adil yakomeje kumufatafata amukora ku bitugu ndetse anamusoma mu gahanga ibintu byahagurukije benshi.
Abantu bibajije impamvu uyu mutoza yakoze ibi aho benshi bemeza ko ari agasuzuguro k’uyu mutoza dore ko asanzwe anabikora abanyamakuru b’imikino aho ababwira amagambo akomeretsa.
Kuri uyu wa gatatu ikipe ya APR izahura na Rayon Sports mu mukino wo kwishyura wa kimwe cya kabiri y’igikombe cy’amahoro aho itike ya macye izaba ari ibihumbi 10.
About The Author
