Ikipe ya APR FC yegukanye igikombe cya shampiyona ku ncuro yayo ya 20 mu mateka, nyuma yo gutsinda Police FC ibitego 2-0.
Police FC yari yakiriye APR FC kuri Stade ya Kigali i Nyamirambo, mu mukino w’umunsi wa nyuma wa shampiyona iyi kipe y’Ingabo z’Igihugu yasabwaga gutsinda ikegukana igikombe cya shampiyona yari ihataniye na Kiyovu Sports.
Ibitego bibiri byombi byatsinzwe na Mugisha Gilbert ni byo byafashije iyi kipe kwegukana kiriya gikombe, kiba icya gatatu cyikurikiranya iheshejwe n’umutoza Mohammed Adil Erradi.
APR FC yatangiye igice cya mbere cy’umukino yotsa igitutu Police FC, gusa uburyo buke bw’ibitego yagiye ibona inanirwa kububyaza umusaruro.
Uburyo bwa mbere bukomeye ku ruhande rw’iyi kipe y’Ingabo z’Igihugu bwabonetse ku munota wa 14 w’umukino, ubwo myugariro Ndayishimiye Dieudonné yahinduraga umupira mwiza imbere y’izamu bikarangira Nshuti Innocent ananiwe kuwufata.
Nyuma y’iminota ine Byiringiro Lague yabonye ubundi buryo bukomeye, gusa ananirwa gushyira umupira mu izamu rya Ndayishimiye Eric Bakame.
Uburyo bukomeye muri uyu mukino bwaje ku munota wa 40 w’umukino, ubwo Mugisha Gilbert yarekuraga izamu rikomeye rigarukurwamo na Bakame, ku mupira Nshuti Innocent yari yinjiranye mu rubuga rw’amahina bikarangira Moussa Omar ananiwe kuwukura imbere y’izamu rye.
Uburyo bukomeye ku ruhande rwa Police FC ni ubwa Iyabivuze Osée wahawe umupira ari mu rubuga rw’amahina, ateye agashoti koroheje gafatwa na ishimwe Pierre.
APR FC yagarutse mu gice cya kabiri cy’umukino isatira cyane Police FC, mbere yo gufungura amazamu ku munota wa 52 w’umukino ibifashijwemo na Mugisha Gilbert.
Hari ku mupira wabanje guturuka kuri koruneri ya Lague Byiringiro ukubitwa ibipfunsi n’umunyezamu Bakame, mbere yo gusanga Gilbert warekuriye watereye kure ishoti ryagenderaga hasi riruhukira mu nshundura.
Uyu rutahizamu wahoze akinira Rayon Sports yatsinze igitego cya kabiri ku munota wa 90+2, ku mupira yari ahawe na Faustin Usengimana; asiga Abouba Sibomana mbere yo kurekura ishoti riremereye ryaruhukiye mu izamu rya Bakame.
APR FC yegukanye igikombe nyuma yo kurangiza shampiyona ifite amanota 66, irusha rimwe Kiyovu Sports yatsinze Marines FC. Uretse APR FC yatwaye igikombe, shampiyona yasize amakipe ya Etoile de l’Est na Gicumbi asubiye mu cyiciro cya kabiri nyuma yo guherekeza andi.
About The Author
