Ndangwa Ally uheruka gukatirwa ashinjwa kwiba Yago Tv Show ,yatangaje ko yiteguye kuvuga ukuri nyuma yo kubona ko Nyarwaya Innocent [Yago] adasobanura imvano y’ibyabaye byose.
Ku wa 01 Nyakanga 2024 ni bwo Yago ahagana saa yine za mu gitondo urubuga rwa YouTube rwe rwibwe, nyuma bigizwemo uruhare n’Urwego rw’Igihugu rw’Ubugenzacyaha ku wa 20 Nyakanga 2024 rwaje kuboneka.
Uwashinjwe kurwiba akaba ari Ally Ndangwa [Ally Bizzo] waje gukatirwa ku wa 08 Kanama 2024 imyaka ibiri isubikiye muri umwe, mu rubanza rwabereye ku rukiko rw’ibanze rwa Nyarugenge.
Uwo munsi Ally Ndangwa yahise arekurwa gusa ngo ageze mu rugo arebye ibiganiro Yago yakoze abona bihabanye n’ukuri.
Mu mashusho y’iminota 3 n’amasegonda, Ally yavuze ko yiteguye gushyira hanze ukuri, ati”Nikojeje kuri YouTube ndeba ibiganiro nyiri ukwibwa yakoze bibiri, narabirebye byose ndabirangiza nsanga bihabanye n’ukuri guhari.”
Uyu musore yibaza icyateye Yago kubigenza gutyo, ati”Sinzi impamvu ari guca ukuri hejuru adashaka kuvuga nyine uko ibintu bimeze.”
Ally avuga ko ari wo mwanya abonye wo gukura abantu mu rungabangaba, ati”Gusa niyo mpamvu nahisemo kumunyomoza nkavuga ukuri kose guhari kugira ngo biriya bintu bibeho.”
Ashimangira iyi ngingo agira ati”Ari kuvuga ibinyoma kuki adashaka kuvuga ibintu byose uko byagenze, niba adashaka kuvuga ukuri kuko ibintu byagenze, ndavuga ukuri nta kimwe nsize.”
Yongeraho ati”Ndaguta hanze ndakurambika hariya rubanda rukote wowe urajya kuri Camera ukigira umwana mwiza, indyarya ndaguta hanze rubanda rukote.”
Umubano wa Yago na Ally ntabwo usobanurwa neza gusa hari amakuru yakomeje kugenda acaracara avuga bigeze ko gukoranaho.
Mu minsi 20, Yago TV Show yaravuyeho igahindurirwa izina, yagaruwe kandi ku bufasha bwa Lick Lick muri iyi minsi uri gukorana na Yago Pon Dat.
About The Author
