Abayobozi bakuru b’urwego rushinzwe ubutasi bwa Gisirikare muri Uganda (CMI) bari hano mu Rwanda, aho bitabiriye inama yabahuje n’ab’urwego rushinzwe ubutasi bwa Gisirikare hano mu Rwanda.
Iri tsinda ry’abatasi ba Uganda riyobowe na Maj Gen James Birungi ukuriye CMI.
Umugaba w’Ingabo za Uganda zirwanira ku butaka, Lt Gen Muhoozi Kainerugaba, yifashishije Twitter yashimiye Perezida Paul Kagame na Brig Gen Vincent Nyakarundi ukuriye ubutasi bw’u Rwanda kuba bakiriye ziriya ntumwa i Kigali.
Gen Muhoozi ntiyatangaje ibyo impande zombi zaganiriye. Izi ntumwa za Uganda zije mu Rwanda nyuma y’iminsi mike nanone abakuriye ubutasi bw’ibihugu byombi bahuriye mu nama y’iminsi ine i Kampala muri Uganda.
Ni inama yasize ibihugu byombi bisinyanye amasezerano akubiyemo ingingo y’ubufatanye mu guhanahana amakuru mu rwego rwo guhashya iterabwoba n’ibyaha byambukiranya imipaka.
About The Author
