Kuri uyu wa Gatanu tariki 25 Werurwe 2022, irushanwa rya Mr Rwanda 2022 ryatangiriye mu Karere ka Rwamagana mu Intara y’Iburasirazuba, aho hiyandikishije abasore 67 bo mu turere dutandukanye tugize iyi Ntara n’ahandi.
Igikorwa cyo guhitamo aba basore cyabereye kuri Deleva Hotel yo muri Rwamagana. Akarere ka Rwamagana kashyizweho n’itegeko muri Mutarama 2006, ni kamwe mu Turere 7 tugize Intara y’Iburasirazuba, akaba ari nako karimo icyicaro cy’Intara.
Sunday Justin wari ukuriye Akanama Nkemurampaka yavuze ko aba basore 5 babahisemo bashingiye ku ishyaka ry’umusore hakubiyemo intambuko, igihagararo, ubutwari n’ibindi.
Bashingiye kandi ku bwenge harimo uburyo asobanura ibitekerezo bye ndetse banareba ku muco. Ati “Umusore uzavamo Mister Rwanda 2022 azaba afite inshingano zo guhagararira u Rwanda, rero agomba kuba azi umuco.”
Abasore 5 babonye itike yo guhagararira Uburasirazuba ni: Rukundo Dismas [Nimero 9], Gatsinzi Didier [Nimero 16], Mutangana Francis [Nimero 11], Mugisha Faustin [Nimero 27] ndetse na Ngiruwonsanga Regis [Nimero 5].
Rukundo Dismas uri mu basore bakomeje muri Nzeri 2021 yahagarariye u Rwanda mu irushanwa rya Mister Africa International 2021 abasha kwegukana ikamba ry’umusore ugaragara neza. Icyo gihe, umusore witwa Eryvaldo Reis ni we wegukanye ikamba rya Mister Africa 2021 rihatanyemo abasore 19.
Iri rushanwa ryari rihatanyemo abasore 19 bo mu bihugu bitandukanye byo muri Afurika harimo na Rukundo Disman w’imyaka 26 wari uhagarariye u Rwanda.
Nyuma yo kuva mu Ntara y’Uburasirazuba, iki gikorwa kizakomeza kuri uyu wa 27 Werurwe 2022 amajonjora mu Karere ka Rubavu mu Burengerazuba, ku wa 29 Werurwe 2022 amajonjora azabera mu Karere ka Huye mu Ntara y’Amajyepfo, amajonjora azarangirira mu Mujyi wa Kigali ku wa 30 Werurwe 2022.
Akanama Nkemurampaka kazifashishwa mu rugendo rw’amajonjora kagizwe na Aissa Cyiza, Sunday Justin ndetse na Sebudwege Justin.
About The Author
