Abasirikare bakuru ba FARDC bapfiriye ku rugamba bashyinguwe, Congo ishimangira ko bishwe n’amasasu ya RDF

I Goma habaye umuhango wo gusezera ku bofisiye bakuru batatu mu ngabo za Repubulika ya Demukarasi ya Congo, FARDC, baherutse gupfira mu mirwano yabereye mu gace ka Kibumba muri teritwari ya Nyiragongo na Rugari muri teritwari ya Rutshuru.

Uyu muhango witabiriwe n’Umugaba Mukuru w’ingabo za RDC, Gen. Célestin Mbala, Guverineri w’intara ya Kivu y’Amajyaruguru ku rwego rwa gisirikare, Lt Gen. Constant Ndima Kongba n’abandi basirikare bakuru. Witabiriwe kandi n’abasirikare bari bahagarariye abari mu butumwa bw’amahoro bw’Umuryango w’Abibumbye, MONUSCO, na bo binjiye muri iyi mirwano bemeza ko ari iya FARDC n’umutwe witwaje intwaro wa M23.

FARDC yatangarije kuri Twitter ubutumwa bw’uyu muhango kuri uyu wa 4 Kamena 2022 bugira buti: “Umuhango wo gusezera bwa nyuma ku basirikare ba FARDC bishwe n’amasasu y’ingabo z’u Rwanda i Kibumba na Rugari wabereye kuri sitade Afia y’i Goma muri Kivu y’Amajyaruguru.”

Abasirikare basezeweho ni Colonel Mushagarusha, Lieutenant Colonel Bitwenge Ruvusa Alex na Dr Fiston Hubert Butshitshi wari umuganga w’abasirikare, bose bapfiriye ku rugamba ngo “ubwo barwaniriraga ubusugire bw’igihugu.”

FARDC yatangaje ko aba bofisiye biciwe mu mirwano yabaye hagati ya tariki ya 23 na 28 Gicurasi 2022, yari yarabanje kwemeza ko yayihuje na M23, ibinyujije mu bavugizi bayo: Brig. Gen. Sylvain Ekenge wo ku rwego rw’intara ya Kivu y’Amajyaruguru na Lt Col. Ndjike Kaiko Guillaume wa Operasiyo Sokola 2.

Leta y’u Rwanda yahakanye inshuro zirenze imwe uruhare ingabo zayo zishinjwa muri iyi mirwano, isobanura ko iki ari ikibazo kireba Abanyekongo, bityo nta nyungu ifite zo kuba yakwinjira mu bibazo bwite by’iki gihugu. Ikirego cyagejejwe mu muryango w’akarere k’ibiyaga bigari, urwego rwawo rushinzwe kugenzura umutekano w’imbibi z’ibihugu biwugize, EJVM, rukora iperereza, gusa icyavuyemo ntikiramenyekana.

Cyagejejwe kandi no mu nama y’akanama k’Umuryango w’Abibumbye gashinzwe umutekano iherutse kubera i New York muri Leta Zunze Ubumwe za Amerika, abari bahagarariye za guverinoma birinda kugaragaza aho bahagaze, basaba ko ibihugu byombi bikemura aya makimbirane biciye mu biganiro.

Muri rusange, abasirikare ba FARDC baguye muri iyi mirwano ni 16, abakomeretse ni 22. Nta mibare yatangajwe ku ruhande rwa M23.