Iyi nkuru izajya yibanda cyane ku rutonde rw’uburyo abahanzi basoje ukwezi bahagaze ku rubuga rwa YouTube rumaze kuba ubukombe mu gutambutsa ibihangano by’abahanzi.
Urubuga rwa YouTube rugaragaza ko kuva tariki 3-30 Nyakanga 2024, iminsi 28 y’uku kwezi yasize umuhanzi Chriss Eazy ari we uyoboye abandi kwigwizaho igikundiro ku bakurikira uru rubuga bari mu Rwanda.
Chriss Eazy ayoboye abandi bahanzi n’abarenga miliyoni 2,41 by’abarebye ibihangano bye, agakurikirwa na Bruce Melodie ufite ababirebye barenga miliyoni 1,28.
Bwiza ari ku mwanya wa gatatu n’abarenga miliyoni 1,25 by’abarebye ibihangano bye, mu gihe Meddy ari ku mwanya wa kane n’abarenga miliyoni 1,23.
Ku mwanya wa gatanu hari Danny Nanone ufite ibihangano byarebwe n’abarenga miliyoni 1,04, mu gihe ku mwanya wa gatandatu hari Israel Mbonyi w’ibihangano byarebwe n’abarenga ibihumbi 966.
Ku mwanya wa Karindwi habarizwa Element Eleeeh ufite ibihangano byarebwe n’abarenga ibihumbi 960, agakurikirwa na Vestine na Dorcas bafite bafite indirimbo zarebwe n’abarenga ibihumbi 894.
Ku mwanya wa cyenda hari Director Gad ufite indirimbo imwe rukumbi icyakora akaba akunze gusangiza abamukurikira amashusho y’indirimbo yakoreye abandi bahanzi, ibihangano bye bikaba byararebwe n’abarenga ibihumbi 800 mu gihe ku mwanya wa cumi ho hari Fanta Pro ufite ibihangano byarebwe n’abarenga ibihumbi 741.
Si abahanzi gusa Chriss Eazy ayoboye, n’indirimbo ye Sekoma iyoboye iz’abandi mu kurebwa cyane.
Uretse kureba abahanzi bafite ibihangano byarebwe n’abantu benshi muri rusange, iyo utereye ijisho ku bihangano byarebwe cyane muri Nyakanga 2024, nubundi usanga Chriss Eazy akiyoboye ku barebye Sekoma bari ku butaka bw’u Rwanda.
Indirimbo Sekoma ye iri ku mwanya wa mbere n’abayirebye bari ku butaka bw’u Rwanda barenga miliyoni 1,49 igakurikirwa na Ogera ya Bwiza na Bruce Melodie yarebwe n’abarenga ibihumbi 920.
Molomita ya Director Gad yo yarebwe n’abarenga ibihumbi 800 mu gihe ku mwanya wa kane hari Milele ya Element Eleeeh yarebwe n’abarenga ibihumbi 706.
Sowe ya Bruce Melodie yarebwe n’abarenga ibihumbi 656 iza ku mwanya wa gatanu mu gihe iya gatandatu ari Jugumila ya Chriss Eazy, Phil Peter na Kevin Kade yarebwe n’abarenga ibihumbi 621.
Ku mwanya wa karindwi hari Amanota ya Danny Nanone imaze kurebwa n’abarenga ibihumbi 581, Neema ya Dorcas na Vestine yarebwe n’abarenga ibihumbi 473 bikayishyira ku mwanya wa cyenda, naho Golo ya Kizito Passy ikaza ku mwanya wa cumi n’abayirebye barenga ibihumbi 435.
About The Author
