Abadepite mu Nteko Ishinga Amategeko ya Uganda barasaba Guverinoma yabo gutanga ibisobanuro ku ifungurwa ry’umupaka wa Gatuna riherutse kubaho, bavuga ko ririmo urujijo.
Leta y’u Rwanda yafunguye umupaka wa Gatuna tariki ya 31 Mutarama 2022, nyuma y’imyaka itatu wari umaze ufunze bitewe n’amakimbirane ibihugu byombi bifitanye.
Ku wa 1 Gashyantare 2022, abadepite mu Nteko ya Uganda barateranye biga ku ngingo zitandukanye zirimo ifungurwa ry’uyu mupaka, basaba ibisobanuro ku mpamvu hari abatarimo kwemererwa kwambuka.
Inteko ya Uganda kuri Twitter yagize ati : « Abagize Inteko Ishinga Amategeko basabye Guverinoma gutanga ibisobanuro ku ifungurwa ry’umupaka wa Katuna uri hagati ya Uganda n’u Rwanda, bavuga ko Abanya-Uganda bari mu rujijo kandi batazi ikigenda. Abadepite bavuga ko hari amabwiriza i Katuna nyuma y’ifungurwa.”
Muri videwo yashyize kuri uru rubuga, humvikanamo umudepite John Baptist Nambeshe agira ati: “Amakuru ari kutugeraho ateye urujijo, mu gihe abantu bagenda, baracyahura n’inzitizi. Ntabwo tuzi niba ufunguye igice, amakamyo atemerewe kwambika cyangwa se hari ibyiciro by’abagenzi ba ngombwa n’abatari ngombwa.”
Mugenzi we Geoffrey Macho abona ko ibibazo nk’iki n’ibyamaze igihe kinini ku mupaka wa Busia uhuza Uganda na Kenya biterwa n’uko Guverinoma zemeranya ku masezerano ariko ntizandike ibikubiyemo, asaba ko Uganda yohereza Minisitiri ushinzwe umuryango wa Afurika y’iburasirazuba (EAC) mu Nteko, agatanga ibisobanuro ku kibazo bavuga kiri ku mupaka wa Gatuna.
Umunyamabanga wa Leta muri Minisiteri y’Inganda, David Bahati, wari kumwe n’abadepite mu Nteko, yababwiye ko Perezida Yoweri Museveni yabasobanuye ko umupaka wafunguriwe amakamyo atwara ibicuruzwa, mu gihe hakigenzurwa ingamba zo kurwanya icyorezo cya Covid-19.
Minisitiri Bahati yagize ati: “Perezida yadusobanuriye mu nama y’abaminisitiri ko ifungurwa ryabaye ejo ariko uruhande rw’u Rwanda rufunguriwe amakamyo atwara ibicuruzwa gusa kubera ko bakigenzura Covid-19 ku mipaka yabo yose.”
Iki kibazo n’Umuvugizi wa Guverinoma y’u Rwanda, Yolande Makolo aherutse kukivugaho ubwo yasubizaga umunyamakuru wo muri Uganda wavugaga ko abanya-Uganda bashaka kwambuka baza mu Rwanda batari kwemererwa.
Uwo munsi Makolo yavuze ko amakamyo n’Abanyarwanda bava muri Uganda ari bo bambuka, hashingiwe ku ngamba za EAC zo kurwanya Covid-19.
Yagize ati: “Amakamyo n’Abanyarwanda/abataha barimo kwinjira mu Rwanda banyuze Gatuna nk’uko bimeze ku yindi mipaka, hashingiwe ku ngamba za EAC zo kurwanya Covid. Nk’uko itangazo ribivuga, abashinzwe ubuzima mu Rwanda n’abo muri Uganda barimo gufatanya kugenzura iyubahirizwa ry’aya mabwiriza ya Covid, kugira ngo bose bafashwe kwambuka baturutse ku mpande zombi.
About The Author
