Abafana ba Kiyovu Sports bakozanyijeho na bakeba babo ba Rayon Sports mu mukino wa ¼ cy’Igikombe cy’Amahoro, iyi kipe yo ku Mumena yatsinzemo Rwamagana City FC ibitego 3-0.
Ni umukino watangiye saa Sita n’igice kuri Stade ya Muhanga ku wa Gatatu, tariki 26 Mata 2023. Watangiye kare kubera ko wagombaga gukurikirwa n’undi wari guhuza Rayon Sports yatsinzemo Police FC ibitego 3-2. Abafana ba Murera binjiye hagati mu mukino wa mbere.
Ku munota wa 75 w’umukino wa Kiyovu Sports na Rwamagana City FC, abafana babiri ba Rayon Sports begereye uruhande rwari ruhagazemo abafana ba Kiyovu Sports baririmba indirimbo zibaharabika bashaka kubarusha amajwi ngo babace intege.
Umwe mu bari bashinzwe umutekano kuri stade yabwiye IGIHE ko nyuma y’uko abafana ba Kiyovu Sports umujinya ubazamukanye, basubije aba Rayon Sports indi ndirimbo ibapfobya maze batangira kubwirana amagambo akomeye.
Nyuma y’uko ubushyamirane bwari bukomeje gufata indi ntera, umwe mu bafana ba Kiyovu Sports yamennye amazi ku wa Rayon Sports wakomezaga kubegera maze imvururu zitangira ubwo.
Aba ba-Rayon babiri bakomeje kubwira aba Kiyovu Sports ko iheruka igikombe bataravuka, ndetse ko batarabona ikipe yabo ikora ibisa n’ibyo. Abayovu batangiye guserereza aba ba-Rayon babita ababoyi.
Guterana amagambo byakomeje ndetse bikurikirwa no gufatana mu mashati, abashinzwe umutekano kuri stade bahagobotse bakiza impande zombi zari ziri gushyamirana.
Abashinzwe umutekano bafashe abafana ba Rayon Sports babamurura ku ba Kiyovu Sports babajyana mu ruhande bagomba kwicaramo, aha bahahuriye n’Umuvugizi wa Gikundiro, Nkurunziza Jean Paul wagiranye ikiganiro kigufi n’uruhande rwa Kiyovu Sports aragaruka asaba abafana be gutuza na bo barabikora.
Polisi y’Igihugu kandi na yo yabasabye koroherana na bagenzi babo bagakomeza umukino wakurikiyeho mu mahoro.
Nyuma yo gukomeza muri ½ itsinze Rwamagana City FC ibitego 3-0, iyisezerera ku giteranyo cya 5-3 mu mikino yombi, Kiyovu Sports izahura na APR FC, yo yasezereye Marines FC iyitsinze ibitego 6-3.
About The Author
