Umuryango IBUKA uharanira inyungu z’abarokotse jenoside yakorewe Abatutsi mu 1994 urifuza ko umunyapolitiki Ingabire Umuhoza Victoire yamburwa imwe mu mitungo yabaruweho.
Perezida w’uyu muryango mu karere ka Nyarugenge, Rukemampunzi Jean Claude, yatangarije Imvaho Nshya ko Ingabire Victoire yibarujeho imitungo y’umubyeyi we, Dusabe Thérèse wahamijwe uruhare muri jenoside yakorewe Abatutsi.
Rukemampunzi yagize ati: “Ni umumama witwa Thérèse uri mu cyiciro cya mbere cy’abakoze jenoside muri Mageragere, aho uwo mutungo wanditswe kuri Ingabire Victoire kandi mu by’ukuri Thérèse ariho. Ibyo byakozwe n’ubuyobozi, burahari. Ubuyobozi buracyari mu nshingano. Icyo babakoreye ni ihererekanya.”
Uyu muyobozi yagaragaje ko umutungo Ingabire yabaruweho wakabaye usubizwa mu mutungo rusange w’igihugu, ukazifashishwa mu kwishyura indishyi abangiririjwe imitungo mu gihe cya jenoside yakorewe Abatutsi.”
Rukemampunzi yavuze ko IBUKA izagereza ibishoboka kugira ngo imitungo yari iya Dusabe yabaruwe kuri Ingabire imukurweho, nibidashoboka yitabaze.
Ati: “Ntabwo rero twabireberera ngo tubyihorere. Ni cyo tubereyeho. Tugomba kubiharanira, byaba na ngombwa tukajya no mu nkiko.”
Dusabe Thérèse yahamijwe n’Urukiko Gacaca uruhare muri jenoside yakorewe Abatutsi, akatirwa igifungo cya burundu y’umwihariko adahari kandi kugeza n’ubu ntaraboneka.
About The Author
