Umunya-Afurika y’Epfo Callum Ormiston ukinira ikipe y’Igihugu cye ni we wegukanye agace ka gatanu ka Tour du Rwanda 2023, nyuma y’uko Umwongereza Christopher Froome wahabwaga amahirwe yo kukegukana nyuma yo kukayobora igihe kirekire agize ikibazo cy’igare.
Agace ka gatanu ka Tour du Rwanda kuri uyu wa Kane kavaga mu karere ka Rusizi kerekeza i Rubavu, ku ntera y’ibilometero 195. Ni ko gace ka kabiri karekare kurusha utundi nyuma y’aka gatatu kavaga mu karere ka Huye kerekeza i Musanze.
Chris Froome usanzwe akinira ikipe ya Israel–Premier Tech, ni umwe mu bari bahanzwe amaso kuri uyu wa Kane nyuma yo kudahirwa n’uduce tune twa Tour du Rwanda twabanje.
Uyu mugabo wasoje agace ka kane ari uwa 21 ku rutonde rusange, yageze ku ntera y’ibilometero 105 intera yari hagati ye na bagenzi be iri ku minota itatu n’amasegonda 40.
Hagati aho abasiganwa ni na ko bari bahanganye n’imvura nyinshi yagwaga mu ntara y’Uburengerazuba.
Iki kinyuranyo cyatangiye kugabanuka ubwo Chris Froome w’imyaka 37 y’amavuko yari atangiye kuzamuka umusozi wa Congo-Nili mu karere ka Rutsiro, kuko byibura ubwo yari amaze gukora intera y’ibilometero birenga 120 ikinyuranyo cyari hagati ye na bagenzi be cyari iminota itatu n’amasegonda 15.
Kuzamuka Congo-Nili isanzwe ireshya n’ibilometero birenga bibiri biri mu byatumye Froome waherukaga kwegukana isiganwa iryo ariryo ryose muri 2018 ubwo yegukanaga Giro d’Italia atangira kugaragaza umunaniro, mu gihe isiganwa ryari rikibura ibilometero 65 ngo risozwe.
Intera yari hagati ya Froome n’Umutaliyani Matteo Badilatti usanzwe akinira Q36.5 Pro Cycling Team yari imaze kuba umunota umwe n’amasegonda 30.
Isiganwa ubwo ryaburaga ibilometero bibarirwa muri 40 ngo rirangire Chris Froome wari wongeye kuzamura ibihe yatobokesheje ipine ndetse igare rye riza no kugira ikibazo cya tekiniki, biba ngombwa ko abari inyuma ye barimo na Ormiston bahita bamucaho.
Isiganwa byibura ryageze mu bilometero 30 bya nyuma yasizwe n’igikundi iminota ibarirwa muri itatu.
Callum Ormiston yegukanye étape ya gatanu ya Tour du Rwanda akoresheje amasaha ane, iminota 59 n’amasegonda 51; yasize amasegonda atandatu Umutaliyani Calzoni Walter wa Q36.5 Pro Cycling Team y’iwabo wamukurikiye.
Umunyarwanda waje hafi muri aka gace ni Muhoza Eric wa Bike Aid yo mu Budage wageze i Rubavu na we yasizwe amasegonda atandatu.
Agace ka gatanu ka Tour du Rwanda kasize Umubiligi Lecerf William Junior ari we wambaye umwambaro w’umuhondo, akaba arusha amasegonda abiri umunya-Ukraine Budiak Anatoli umukurikiye.
Muhoza Eric ni we munya-Rwanda uri hafi ku rutonde rusange aho ari ku mwanya wa karindwi, arushwa amasegonda 11 n’uwa mbere.
About The Author
