Urukiko rwisumbuye rwa Nyarugenge rwemeje ko Dr Kayumba Christopher adahamwa n’icyaha cyo gusambanya ku gahato n’ubwinjiracyaha kuri iki cyaha, rutegeka ko ahita afungurwa umwanzuro ukimara gusomwa.
Dr Kayumba wabaye umwarimu muri kaminuza y’u Rwanda, umunyamakuru n’umunyapolitiki yatawe muri yombi muri Nzeri 2021, akekwaho gusambanya abakobwa babiri barimo uwari umukozi wo mu rugo rwe n’uwari umunyeshuri we muri Kaminuza y’u Rwanda.
Kuva mu rukiko rwisumbuye rwa Kagarama kugeza mu rwisumbuye rwa Nyarugenge, we yavugaga ko atigeze akora ibi byaha, ahubwo ko ari ibirego bihimbano bishingiye ku nyungu za politiki aribyo Yaboneyeho gusaba kugirwa umwere.
Mu iburanisha ryabereye mu rukiko rwisumbuye tariki ya 13 Mutarama 2023, ubushinjacyaha bwasabye ko Dr Kayumba yahamywa ibi byaha, agakatirwa gufungwa imyaka 10 n’amezi 6.
Byari byitezwe ko urubanza ruzasomwa tariki ya 10 Gashyantare 2023, gusa uwo munsi isomwa ryimuriwe kuri uyu wa 22 Gashyantare ari bwo Urukiko rwamugize umwere, rutegeka ko ahita afungurwa.
Dr Kayumba yashinze ishyaka rya Politiki yise RPD (Rwandese Platform for Democracy)
About The Author
