Umucamanza mu rukiko rukuru rw’Ubucuruzi mu Rwanda kuri uyu wa Gatatu yasibye mu bitabo by’inkiko urubanza rw’ubujurire uruganda rw’itabi rwa nyakwigendera Asinapol Rwigara rwaregagamo banki y’ubucuruzi ya COGEBANK
Ni icyemezo cyafashwe ngo nyuma yo kubona uruganda Premier Tobacco Company Ltd rudahagarariwe kandi ari rwo rwatanze ikirego rwaregeraga kwemeza ko rutabereyemo umwenda COGEBANK no gusaba gusubirana ibyangombwa by’imitungo yarwo.
Uruganda Premier Tobacco Company Ltd rwari rwajuririye icyemezo cyarutegekaga kwishyura miliyoni 340 Frw rubereyemo COGEBANK.
Mu rukiko hagaragaye umufasha wa nyakwigendera Rwigara Assinapol, Adeline Mukangemanyi, n’umunyamategeko Alain Pierre Munyangabe wunganira COGEBANK.
Abajijwe niba ari mu rukiko yiteguye kuburanira PTC, Mukangemanyi yavuze ko ataruhagariye.
Ati “Ni uruganda rwacu rwibwe niba hari umwenda dufite bajye kubaza abarwibye.”
Nyuma y’impaka ndende hagati ya Mukangemanyi n’urukiko rwari rukomeje kumubaza niba ahagarariye uruganda ariko we agakomeza kumvikanisha ko ataruhagarariye ahubwo yiburanira nk’umugore wa Rwigara anahagarariye umuryango, Me Munyangabe yavuze ko we n’abana be ntaho bahuriye n’urubanza PTC aburana, asaba ko niba atayihagarariye yakwicara agakurikirana urubanza nk’abandi.
Urukiko rwavuze ko ababuranyi badahinduka ku rwego rw’ubujurire kandi ko ari nako amategeko abiteganya, avuga ko Mukangemanyi n’abana be atari ababuranyi muri uru rubanza, avuga ko niba hari ibindi bibazo birushamikiyeho byazakurikiranwa ukwabyo, asaba Mukangemanyi kwicara agakurikirana urubanza nk’abandi baturage basanzwe PTC idahagarariwe.
Me Munyangabe yahise atanga icyifuzo cyo gusibisha mu bitabo by’inkiko urubanza rw’ubujurire rwatanzwe na PTC Ltd, urukiko rushingiye ku ngingo z’amategeko rwemeye icyifuzo cy’uwunganira COGEBANK nyuma yo kubona PTC ititabiriye iburanisha kandi ari yo yajuriye.
Adeline Mukangemanyi Rwigara we yabwiye Ijwi rya Amerika ko azakomeza gukurikirana imitungo y’umuryango wa Assinapol Rwigara kugeza ku iherezo.
About The Author
